Bollivudda nifrət dalğası: Pakistanlılar hədəfdə
Son illərdə Hindistan kinosunda siyasi və ideoloji motivlərin güclənməsi beynəlxalq müzakirələrə səbəb olur. Bu kontekstdə Pakistanın Dawn qəzetində dərc olunan məqalə Bollivudun artan islamofob və anti-Pakistan ritorikasını tənqid edərək, bu tendensiyanın regional və qlobal nəticələrinə diqqət çəkir.
Crossmedia.az Dawn qəzetinə istinadən xəbər verir ki, hüquqşünas və insan haqları müdafiəçisi Rafia Zakariyanın məqaləsi dərc olunub. Məqalədə Hindistan kinematoqrafiyasında yayğın olan anti-Pakistan və anti-müsəlman ritorikası tənqid edilir.
Müəllif kriminal hadisələri Kəraçi ilə əlaqələndirən və Mumbay terror aktı ilə bağlayan “Dhurandhar” filminə diqqət çəkərək, Bollivudun pakistanlıları və müsəlmanları sistemli şəkildə düşmən obrazında təqdim etməsinin səbəblərini sual edir. Zakariyanın fikrincə, bu cür filmlər islamofobiyanın təzahürüdür və Hindistan dövlətinin təşviq etdiyi millətçi gündəliyi əks etdirir.
Qeyd olunur ki, film Hindistanda populyarlıq qazansa da, artıq Fars körfəzi ölkələrinin bir neçəsində qadağan edilib. Bu amilin filmin kommersiya perspektivlərinə mənfi təsir göstərə biləcəyi vurğulanır.
Zakariya bu tendensiyanı hindutva ideologiyasının güclənməsi və ultrasağçı RSS təşkilatının təsiri ilə əlaqələndirir. Müstəqil araşdırmalara görə, RSS Hindistan cəmiyyətində və onun hüdudlarından kənarda dərin şəkildə kök salıb.
Məqalədə bildirilir ki, Bollivud getdikcə daha çox təbliğat alətinə çevrilir və bu siyasətin bədəli nifrətin artmasıdır. Müəllifə görə, bu nifrət Hindistanı daxildən zəiflədir və beynəlxalq ictimaiyyət üçün getdikcə daha aydın görünür
Zeynəb Xuduyeva
16:10 13.12.2025
Oxunuş sayı: 950
