Yunanıstan: İran ABŞ-nin qlobal nəzarət dövrünün başa çatdığını ortaya qoydu
Yunanıstanın sabiq maliyyə naziri Yanis Varufakis ABŞ-nin İrana qarşı illərdir tətbiq etdiyi təzyiq və sanksiyaların effektiv olmadığını bildirib.
Bu barədə Crossmedia.az xarici mediaya istinadən xəbər verir.
Onun sözlərinə görə, İran Vaşinqtonun qəbul etmək istəmədiyi bir reallığı üzə çıxarıb – ABŞ-nin gücü artıq tam nəzarət demək deyil.
Varufakis qeyd edib ki, İran hazırda hər gün Çinə milyonlarla barrel neft ixrac edir və on milyardlarla dollar gəlir əldə edir. ABŞ İranı dünya iqtisadiyyatından təcrid etməyə çalışsa da, Tehran yuanla hesablaşmalar, barter mexanizmləri və Çin neft emalı zavodları vasitəsilə sanksiyaları faktiki olaraq neytrallaşdırıb.
Onun sözlərinə görə, Çinin vasitəçiliyi ilə İran və Səudiyyə Ərəbistanı arasında münasibətlərin normallaşması Qərbi Asiyanın artıq ABŞ mərkəzli siyasətdən uzaqlaşdığını göstərir.
Varufakis əlavə edib ki, İranın asimmetrik təsir şəbəkəsi – Hizbullah, ƏnsarAllah və digər qüvvələr vasitəsilə – Aralıq dənizindən Qırmızı dənizə qədər geniş coğrafiyada təsir imkanları yaradıb. Çin və Rusiyanın dəstəyi ilə İran uzunmüddətli sanksiyaları yeni ittifaqlara və özünütəmin mexanizmlərinə çevirə bilib.
Sabiq nazir vurğulayıb ki, ABŞ-nin qırx illik təzyiqləri nəticə verməyib, dünya isə dəyişib və yeni reallıqda Vaşinqtonun əvvəlki alətləri artıq işlək deyil.
17:58 09.12.2025
Oxunuş sayı: 849
