Qadın və kişi sürücüləri fərqləndirən əsas xüsusiyyət açıqlanıb
Bu il qadın sürücülərin iştirakı ilə baş vermiş qəzaların sayı açıqlanıb. Bu barədə Baş Dövlət Yol Polis İdarəsi məlumat yayıb. Bildirilib ki, bu il qadın sürücülərin iştirakı ilə 107 yol-nəqliyyat hadisəsində 16 nəfər ölüb və 159 nəfər xəsarət alıb. Maraqlıdır, qadın sürücülər say baxımından kişi sürüclərədən heç geri qalmır, lakin kişi sürücülərə nisbətdə qadınlar daha az qəza edib. Bəs bu nədən qaynaqlanır?
Məsələ ilə bağlı Crossmedia.az-a açıqlama verən nəqliyyat eksperti Aslan Əsədov ümumən ölkəmizin gender bərabərliyi baxımından regionda önəmli mövqeyə sahib ölkələrdən biri olduğunu bildirib: "Azərbaycan gender bərabərliyi baxımından regionda önəmli mövqeyə sahib ölkələrdən biridir. Bu gün sürücülük fəaliyyəti nümunəsində də görmək olar ki, qadın və kişi sürücülər arasında hüquqi baxımdan hər hansı fərq mövcud deyil. Yəni nəqliyyat vasitələrindən istifadə zamanı hər kəs bərabər hüquqlara malikdir, xüsusi imtiyaz və ya ayrı-seçkilik tətbiq olunmur. Sürücülük təcrübəsinə nəzər saldıqda, adətən yol hərəkəti prosesində qadın sürücülərin daha təmkinli olduqları müşahidə olunur. Xarici ölkələrdə aparılan təcrübələr də göstərir ki, insan faktoru burada mühüm rol oynayır. Qadın sürücülərə qarşı yol mədəniyyətində nisbətən nəzakətli davranılır, münaqişələrin sayı az olur. Qadın sürücülər isə kişi sürücülərə nisbətən daha az aqressivdirlər və yaranan gərginliyi yumşaltmağa çalışırlar. Bu baxımdan qadın sürücülərin yol-nəqliyyat hadisələrində iştirak faizi də nisbətən aşağıdır. Lakin, təbii ki, onlar da müəyyən hallarda qəza qurbanına çevrilə bilirlər – bəzən sərnişin qismində, bəzən isə birbaşa sürücü kimi. Bu isə ümumi yol təhlükəsizliyi probleminin bir hissəsidir və yalnız cins faktoru ilə izah edilə bilməz. Digər tərəfdən, yol hərəkəti prosesində bəzən işıqforlarda, tıxaclarda və ya gözləmə zərurəti yarandıqda qadın sürücülərin daha ehtiyatlı, bəzən isə tərəddüdlü davranmaları müşahidə olunur. Bu hal kişilər arasında müəyyən narazılıq və əsəb yarada bilər. Məsələn, yaşıl işıq yandıqdan sonra hərəkətə gec başlamaq və ya aşağı sürətlə hərəkət etmək kişilərdə aqressiyanı artıran amillərdəndir".
Ekspert, həmçinin qadın sürücülərin kişi sürücülərdən əsas fərqləndirən cəhətin davranış üslubu olduğunu bildirib:
"Ümumilikdə isə, qadın və kişi sürücülər arasında əsas fərq onların davranış üslubundadır: kişilər daha emosional və aqressiv, qadınlar isə daha təmkinli və ehtiyatlı davranmağa meyillidirlər. Lakin hər iki cinsin sürücülük hüquqları eynidir və bu sahədə hər hansı imtiyaz və ya məhdudiyyət mövcud deyil"- deyə- o əlavə edib.
Elmir Heydərli
14:53 24.09.2025
Oxunuş sayı: 6677
