Suverenliyimizin bərpası Azərbaycanın siyasi qüdrətinin və hərbi gücünün təntənəsidir
Azərbaycan xalqı uzun əsrlik dövlətçilik tariximizin ən şanlı dövrünü yaşayır. Düz beş il əvvəl, 2020-ci ilin payızında Azərbaycan bir yumruq halında birləşərək müdrik dövlət xadimi, ölkəmizin tərəqqi və rifah strategiyasının müəllifi, Ali Baş Komandan, Prezident İlham Əliyevin siyasi iradəsi və məqsədyönlü rəhbərliyi, Müzəffər Azərbaycan Ordusunun qəhrəmanlığı sayəsində 30 ildən artıq bir dövrdə düşmən əsarətində olan Vətən torpaqlarına qovuşdu. Azərbaycan xalqı öz torpağında qürurla yaşamağın sevincini nümayiş etdirdi, ədalətin və hüququn təntənəsinə bütün dünyanı inandıra bildi və bunu ləyaqətlə göstərdi. Ermənistanın yeni işğalçılıq planlarına, növbəti hərbi təcavüz cəhdinə və ardıcıl təxribatlarına cavab olaraq 2020-ci il sentyabrın 27-də başlamış 44 günlük Vətən müharibəsi nəticəsində Azərbaycan Silahlı Qüvvələri Ermənistan ordusunu darmadağın etdi və tarixi Zəfər qazandı. Bununla da Azərbaycan öz torpaqlarını 30 illik işğaldan azad edərək ərazi bütövlüyünün bərpasına və BMT Təhlükəsizlik Şurasının qətnamələrinin yerinə yetirilməsinə nail oldu.
Böyük Zəfərin nəticəsi kimi 2020-ci ilin 10 noyabr tarixli üçtərəfli bəyanatı bölgədə yeni reallıqların əsasını qoydu. Ermənistan kapitulyasiya aktına imza atdı, amma praktiki olaraq bəyanatın bütün müddəaları yerinə yetirilmədi. Üçtərəfli Bəyanata zidd olaraq Ermənistan üç il ərzində öz silahlı qüvvələrini, canlı qüvvəsini və texnikasını bizim ərazimizdən çıxarmamışdı. Qarabağda hələ də Ermənistan ordusunun tör-töküntüləri qalmaqda idi. İmzalanmış kapitulyasiya aktından sonra Azərbaycanın Qarabağ bölgəsində 10 mindən artıq Ermənistan silahlı qüvvələrinin birləşmələri və qeyri-qanuni erməni silahlı dəstələri mövcud idi. Qeyri-qanuni erməni silahlı dəstələrin bölgəni tərk etməməsi, mina təhlükəsinin davam etməsi, diversiya hadisələrinin baş verməsi Azərbaycanın dövlət suverenliyini məhdudlaşdıran əsas maneələr idi.
2022-ci ilin 12–14 sentyabr hadisələri, 2023-cü ilin sentyabrın 19-20-də Qarabağda 24 saatdan az davam edən lokal antiterror əməliyyatı düşmənə layiqli cavab oldu. Bu əməliyyatın ən böyük xüsusiyyəti onun məqsədli və məhdud xarakter daşıması idi. Ermənistan tərəfi üç il ərzində Qarabağda yerləşən silahlı qüvvələrini çıxarmamış, onların mövqelərində modern texnika və canlı qüvvə cəmləşdirmişdi. Bu isə Azərbaycanın ərazi bütövlüyünü və suverenliyini birbaşa təhdid edirdi. Əməliyyat başlamazdan əvvəl Azərbaycan tərəfindən müvafiq xəbərdarlıqlar verilib. Ölkəmiz Ermənistan rəhbərliyinə və beynəlxalq tərəflərə dəfələrlə müraciət edib, Qarabağda qanunsuz silahlı birləşmələrin çıxarılması tələbi ilə çıxış edib. Lakin Ermənistan tərəfi hər dəfə danışıqlardan boyun qaçırıb, sərhəddə və işğal altındakı ərazilərdə təxribatları davam etdirib.
Ordumuz yalnız hərbi obyektləri hədəfə alıb, mülki əhalinin təhlükəsizliyi isə diqqətlə qorunub. Əməliyyatın ən mühüm məqamlarından biri isə mülki əhalinin qorunması idi. Azərbaycan Ordusu bu məsələyə xüsusi həssaslıqla yanaşıb. Humanitar dəhlizlər açılıb, mülki şəxslərə yardım göstərilib, onların təhlükəsizliyi təmin olunub. Antiterror əməliyyatı nəticəsində bölgədə qalan Ermənistan silahlı qüvvələri tam tərksilah edilərək Azərbaycan ərazisindən çıxarılıb, qondarma rejimin qalıqları isə onun ləğv olunduğunu elan edib. Beləliklə də 2023-cü ilin sentyabrın 19–20-də keçirilmiş antiterror əməliyyatı Azərbaycanın dövlətçilik tarixində yeni səhifə açıb. Cəmi 23 saat davam edən və sentyabrın 20-də başa çatan əməliyyat nəticəsində rəşadətli Azərbaycan Ordusu qarşısına qoyulan bütün vəzifələri yüksək peşəkarlıqla yerinə yetirib. Beləliklə, növbəti parlaq Qələbə nəticəsində Azərbaycan Respublikasının suverenliyi tam bərpa edilib.
Böyük Zəfərin 5 illiyinə hazırlaşdığımız bu günlərdə bir vacib məqamı qeyd etməliyik: ərazilərimizin azad olunmasında və suverenliyimizin bərpasında qəhrəman əsgər və zabitlərimizlə yanaşı, tibb işçilərimizin də böyük töhfəsi olub. Onlar öz vəzifə borclarını ləyaqətlə yerinə yetiriblər. Onların arasında əsgərlərimizi xilas edərkən özləri də şəhid olanları var. Ümumilikdə 42 tibb işçisi xidməti vəzifəsini yerinə yetirərkən qəhrəmancasına şəhid olub. Onlardan 9-u həkim, 7-si feldşer, 26-sı sanitardır. Qeyd edək ki, Vətən müharibəsinin yeganə xanım şəhidi Arəstə Baxışova Füzuli, Zəngilan və Qubadlının azadlığı uğrunda gedən döyüşlərdə yaralı hərbçilərə döyüş meydanında tibbi yardım göstərib. Təsadüfi deyildir ki, dövlət başçısı İlham Əliyev 2021-ci il oktyabrın 10-da Xocavənd rayon ictimaiyyətinin nümayəndələri ilə görüşündə həkimlərimizin fədakarlığına yüksək qiymət verib: “Müharibə zamanı fədakarlıq göstərmiş həkimlərin də fəaliyyətini biz gərək qeyd edək. Doğrudan da həkimlər gecə-gündüz yorulmadan, o ağır şəraitdə, çətin şəraitdə öz həyatını risk altına ataraq yaralılara qulluq edirdilər. Şəhidlərimizin sayının o qədər də çox olmamasının səbəblərindən biri də məhz həkimlərdir”.
Bu gün Azərbaycan Respublikasının hər qarış torpağında üçrəngli bayrağımız əzəmətlə dalğalanır. Suverenliyimizin bərpası Azərbaycanın siyasi qüdrətinin və hərbi gücünün bütün dünyada təntənəsidir.
Aytən Qurbanova
YAP Yasamal rayon "H.B.Zərdabi pr.61" (19 saylı Şəhər Poliklinikası) ünvanı üzrə ərazi partiya təşkilatının sədri, 19 saylı Şəhər Poliklinikasının baş həkimi
16:28 17.09.2025
Oxunuş sayı: 1760
