Tokio Qazaxıstanla əlaqələri gücləndirmək niyyətindədir
Yaponiyanın xarici işlər naziri İvaya Qazaxıstana səfəri ərəfəsində “Kazaxstanskaya pravda” qəzetində məqalə dərc edərək, ikitərəfli tərəfdaşlığın daha da dərinləşdirilməsi və regional əməkdaşlığın gücləndirilməsinə sadiqliyini ifadə edib.
“Bu, son üç ildə xarici işlər naziri kimi Qazaxıstana ilk səfərimdir. Mən uzun müddətdir ki, ölkənizi ziyarət etmək istəyirdim və bu fürsətdən xüsusilə məmnunam”, – deyə diplomat vurğulayıb.
Crossmedia.az xarici mətbuata istinadən xəbər verir ki, İvaya xatırladıb ki, Yaponiya, Qazaxıstan müstəqillik əldə etdikdən sonra diplomatik əlaqələr quran ilk ölkələrdən biri olub.O, Yaponiyanın infrastrukturun inkişafına, kadr hazırlığına, energetika layihələrinə və Semeydə nüvə sınaqlarından zərər çəkənlərə göstərdiyi dəstəyi xüsusi qeyd edib.
Nazir həmçinin 2004-cü ildə işə salınan “Mərkəzi Asiya + Yaponiya” dialoq formatına diqqət çəkib və bildirib ki, qlobal qeyri-sabitlik fonunda bu platforma bu gün daha da əhəmiyyətlidir. O, səfərinin əsas məqsədinin ikitərəfli və regional əlaqələrin möhkəmləndirilməsi olduğunu, xüsusilə dayanıqlı inkişaf, ekoloji məsələlər, iqtisadi təhlükəsizlik və humanitar əməkdaşlıq sahələrinə önəm verdiyini bildirib.
Pərvin Hacıyeva
16:07 23.08.2025
Oxunuş sayı: 658
