Avropa İttifaqında Putini ələ saldılar: “Lavrovun marionetkası?”
Avropa Komissarının üzvü Andryus Kubilyus Rusiya Xarici İşlər naziri Sergey Lavrovun bəyanatlarına sərt reaksiya verib və Kremlin real qərarvericisinin kim olduğunu sual altına alıb.
Crossmedia.az xəbər verir ki, bu barədə Kubilyus “x” sosial platformasında yazıb.
“Əsl sahib kimdir: Putin, yoxsa Lavrov? Əgər Tramp ilə görüşdən sonra Lavrov açıq şəkildə Putinin vədlərini təkzib edirsə, onda Putinlə necə danışıqlar aparmaq olar? Bəlkə, Kremlə əslində Putin yox, Lavrov rəhbərlik edir?”, – Kubilyus yazıb.
Məlumata görə, Lavrovun Ukraynaya təhlükəsizlik zəmanətləri ilə bağlı açıqlamaları Rusiya və ABŞ arasında aparılan danışıqlarda “çat” yaradıb. Avropa rəsmilərinin fikrincə, Moskva Vaşinqtonu Kiyevin təhlükəsizlik təminatçısı rolundan imtina etməyə inandırmağa və danışıqları prezidentlər səviyyəsindən daha aşağı mərhələyə keçirməyə çalışa bilər. Bir neçə diplomat isə bunu Rusiyanın ABŞ vasitəçiliyi ilə gedən prosesləri “lətifləşdirmək” niyyəti kimi dəyərləndirib.
Qeyd edək ki, Lavrov daha əvvəl Ukraynanın təhlükəsizlik zəmanətlərini Çin, ABŞ, Böyük Britaniya və Fransanın təmin etməli olduğunu bildirmişdi. O, Rusiyanın iştirak etmədiyi hər hansı mexanizmin isə “çıxılmaz yol” olacağını vurğulamışdı. Bu açıqlamalar Moskva ilə Vaşinqton arasında aparılan danışıqları faktiki olaraq sual altına qoyub.
Xumar Emilqızı
11:34 22.08.2025
Oxunuş sayı: 1215
