Yaponiya müdafiə naziri ilk dəfə Türkiyəyə rəsmi səfər etdi
Yaponiya ilə Türkiyə arasında müdafiə sahəsində əməkdaşlıq yeni mərhələyə qədəm qoyur. İlk dəfə olaraq Yaponiyanın müdafiə naziri Nakatani Ankaraya rəsmi səfər edib. Tərəflər görüşdə müdafiə sənayesində əməkdaşlıq imkanlarını, xüsusilə də Türkiyə istehsalı pilotsuz uçuş aparatlarının alınması məsələsini müzakirə ediblər.
Crossmedia.az xəbər verir ki, Yaponiyanın müdafiə naziri Nakatani ölkənin Türkiyəni rəsmi olaraq ziyarət edən ilk müdafiə naziri olub. Səfər Yaponiyanın silahlı qüvvələrin modernləşdirilməsi çərçivəsində pilotsuz sistemlərin inkişafına artan marağı fonunda baş tutur.
Ankarada Türkiyənin müdafiə naziri Güler ilə aparılan danışıqlar zamanı müdafiə sənayesində əməkdaşlıq perspektivləri, o cümlədən Türkiyə dronlarının mümkün alınması müzakirə olunub. Bildirilir ki, Yaponiya özünümüdafiə qüvvələrini təchiz etmək üçün Baykar şirkətinin istehsalı da daxil olmaqla, Türkiyə istehsalı olan dronları variantlardan biri kimi nəzərdən keçirir.
Türkiyə Müdafiə Nazirliyinin məlumatına görə, Nakatani həmçinin İstanbulda da olacaq və burada hərbi-dəniz gəmiqayırma zavodları, Turkish Aerospace Industries (TUSAS) və Baykar zavodu kimi müdafiə sənayesinin əsas obyektləri ilə tanış olacaq.
Bənövşə Zahidli
09:59 20.08.2025
Oxunuş sayı: 1487
