Sergey Lavrov təyyarə yanacağına ödəniş məsələsinə münasibət bildirib
Rusiya xarici işlər naziri Sergey Lavrov, ABŞ dövlət katibi Marko Rubionun rus nümayəndə heyətinin Alyaskada sanksiyalara görə yanacaq üçün nağd ödəniş etməsi ilə bağlı açıqlamasına münasibət bildirib. Nazir “Rossiya-24” telekanalına verdiyi müsahibəsində qeyd edib ki, yanacaq ödənişləri hər zaman səfəri həyata keçirən ölkənin üzərinə düşən xərclərdir və bu ödənişin nağd və ya başqa formada aparılması fərq etmir.
Crossmedia.az xarici mediaya istinadən bildirir ki, Rubionun NBC News telekanalına müsahibəsində dediyinə görə, nağd ödəniş məcburiyyəti rus nümayəndə heyətinin ABŞ bank sistemindən istifadə edə bilməməsi ilə əlaqədar yaranıb. ABŞ tərəfi bildirir ki, sanksiyalar çərçivəsində Rusiyanın maliyyə əməliyyatlarına məhdudiyyət qoyulduğu üçün nümayəndə heyətinə adi bank köçürmələrindən yararlanmaq mümkün olmayıb.
Lavrov isə bu vəziyyəti şərh edərkən vurğulayıb ki, xarici səfərlərdə bütün logistika və maliyyə xərclərinin ölkə tərəfindən ödənilməsi normaldır. Onun sözlərinə görə, ödənişin forması əsas məsələ deyil, əsas məsələ nümayəndə heyətinin fəaliyyətinin təmin olunmasıdır.
Bu açıqlamalar ABŞ və Rusiya arasında davam edən sanksiyalar fonunda baş verib və tərəflər arasındakı siyasi gərginliyin gündəlik diplomatik proseslərə də təsir etdiyini göstərir.
22:15 19.08.2025
Oxunuş sayı: 1815
