Trampın Azərbaycan-Ermənistan mövzusuna pozitiv ruhda münasibət bildirməsi müsbət hal kimi qiymətləndirilə bilər" - Deputat
Regionda sülh prosesi ilə bağlı son aylarda artan dinamika göstərir ki, tərəflər razılaşmanın son mərhələsinə daxil olur başqa sözlə imzalanm mərhələsinə yaxınlaşırlar. Bu kontekstdə ABŞ kimi uzaq coğrafiyada yerləşən bir dövlətin region barədə ardıcıl və məqsədyönlü açıqlamalar verməsi, həm regionun onun maraq dairəsinində olmasını, həm də prosesə təsir etmək imkanlarını nümayiş etdirir. Xüsusilə də Prezident Donald Trampın məsələ ilə bağlı fikirlər səsləndirməsi, sülh prosesinə qlobal diqqətin artdığını göstərməklə yanaşı, bu istiqamətdə ciddi irəliləyişlərin olduğuna da işarə edir. Onun "Azərbaycan və Ermənistan arasında da yekun sülh üçün çalışırıq və burada yekun həllə çox yaxınıq. Cənubi Qafqazı yenidən böyük edəcəyik" deməsi təqdirəlayiqdir. Sülh sazişinin artıq 17 bənddən ibarət layihəsinin hazırlanması və aparılan danışıqlarda konkret irəliləyişlərin əldə olunması, regionda dayanıqlı sabitliyə aparan yolun real olduğunu təsdiqləyir.
Mövzu ilə bağlı Milli Məclisin deputatı, siyasi elmlər doktoru Rizvan Nəbiyev Crossmedia.az-a açıqlama verib: "Birləşmiş Ştatların özündən çox uzaq coğrafi məkanda yerləşən bir regionda cərəyan edən hadisələrə münasibət bildirməsi, açıqlamalar verməsi göstərir ki, keçmiş münaqişə tərəfləri hazırki de-fakto sülhün uzunümddətli sülhə çevrilməsinə çox yaxındır. 17 bənddən ibarət sülh sazişinin layihəsi üzərində işin hələ bu ilin martında yekunlaşması barədə rəsmi açıqlamalar olmuşdu. Azərbaycan və Ermənistan arasında imzalanması gözlənilən ikitərəfli saziş sülh və dövlətlərarası münasibətlərin yaradılması ilə bağlı çoxşaxəli məsələləri özündə ehtiva edir.
Bununla yanaşı Azərbaycan tərəfinin isə sülh müqaviləsinin imzalanmsı yolunda maneə yaradan məsələlərin aradan qaldırılması ilə bağlı iki əsaslı və haqlı tələbi var. Bu məsələlərə və eləcə də dövlətlərarası normallaşma gündəliyinin müxtəlif aspektlərinə dair Əbu-Dabi görüşündə müəyyən irəliləyişlər əldə olunduğu ehtimalı böyükdür. Dövlətlərarası normallaşma gündəliyi sülh sazişinin birbaşa predmeti olmayan, amma postmünaqişə dövrü çoxsaylı məqamları özündə ehtiva edir. Bunlara Zəngəzur dəhlizinin açılması məsələsi, qarşılıqlı etimadın formalaşdırılması ilə əlaqəli məsələlər, sərhədlərin demarkasiyası və delimitasiyası və digər strateji məqamlar aiddir.
Bu kontekstdə Prezident Trampın mövzuya pozitiv ruhda münasibət bildirməsi müsbət hal kimi qiymətləndirilə bilər. Bu, onu göstərir ki, regionla bağlı məsələlər qlobal güclərin diqqət mərkəzindədir. Təhlillər göstərir ki, Prezident Tramp xüsusilə siyasi dividentlər və diplomatik uğurlar gətirə biləcək məsələlərdə ön plana çıxmağa çalışır. Aylar əvvəl bu mövzu ilə bağlı belə açıqlamalar eşidilmirdi. Amma bu gün biz müşahidə edirik ki, bir həftə ərzində artıq iki dəfə və iki fərqli formatda bu məsələyə toxunulub. Bu isə onu göstərir ki, ABŞ müxtəlif kanallar vasitəsilə kifayət qədər məlumat toplayır və təbii olaraq Tramp kimi bir lider bu məsələləri gündəmdə saxlamaqla həm də siyasi və dövlət xadimi kimi özünü sülh təşəbbüskarı kimi təqdim etməyə çalışır. Onu da vurğulamaq lazımdır ki, vasitəçisiz baş tutan Əbu-Dabi görüşü ilə iştirakçı tərəflər həm də onu mesajı verdilər ki, sülh sazişi keçmiş münaqişə tərəflərinin marağının, onların xaqlarının rifahının təmin edilməsinə xidmət edəcək, hər hansı qüvvələrin geosiyasi maraqlarının təsbit olunmasına yox“.
Ayhan
17:12 19.07.2025
Oxunuş sayı: 5090
