Paşinyan Avropaya getdi: Sülh sazişi təhlükədə - Azərbaycan prosesləri diqqətlə izləyir - Deputat
Son dövrlər Ermənistanın xarici siyasətində müşahidə olunan Qərbyönlü kurs, xüsusilə də Baş nazir Nikol Paşinyanın Avropa İttifaqına inteqrasiya istiqamətində atdığı addımlar və Fransayla yaxınlaşması regionda sabitliyə dair suallar doğurur. Bu fonda Fransa prezidenti Emanuel Makronun yaxın günlərdə Ermənistana planlaşdırılan səfəri və onun mümkün siyasi, hərbi və diplomatik nəticələri Azərbaycan-Ermənistan münasibətlərinə, eləcə də imzalanması gözlənilən sülh sazişinə necə təsir edəcək? Ermənistanın Qərbə meyllənməsi regionda yaranmış həssas balansı poza və sülh prosesinə təhlükə yarada bilərmi? Bu suallar hazırkı geosiyasi kontekstdə xüsusi aktuallıq kəsb edir.
Mövzu ilə bağlı Milli Məclisin deputatı Günay Ağamalı Crossmedia.az-a açıqlama verib:
"Paşinyanın Avropa və xüsusilə Fransa ilə yaxınlaşması onun Rusiya orbitindən uzaqlaşmaq cəhdlərinin bir hissəsidir. Təbii ki, Azərbaycan Ermənistan münasibətlərində ermənipərəst mövqe sərgiləyən Fransanın sülh danışıqlarına töhfə verəcəyi heç inandırıcı deyil. Bu kontekstdə, Emmanuel Makronun Ermənistana planlaşdırılan səfəri Parisin İrəvan üzərində siyasi hakimiyyət qurmaq istəməsinin təzahürüdür. Yəni, adlar dəyişsə də, məntiq eyni olaraq qalır. Fransa tərəfindən mütəmadi olaraq Ermənistana revanşist meylləri körükləməyə xidmət edən siyasi və hərbi-texniki dəstəyin verilməsi sülh sazişi prosesinə süni əngəl yaratmaq məqsədi daşıyır.
Əgər gözlənilən səfər də məhz bölgədə silahlanmanı təşviq edəcəksə , Ermənistanın revanşist dairələrinə arxa durmaq məqsədi daşıyacaqsa, bu, sülh gündəliyinə zidd olmaqla yanaşı, regionda sabitliyin pozulmasına yönəlmiş məsuliyyətsiz davranışdır".
Deputat həmçinin bildirib: "Rəsmi Bakı bütün prosesləri diqqətlə izləyir və mümkün olan hər ssenariyə hazırdır. Eyni zamanda, Azərbaycan sülh gündəliyinə sadiqdir. Paralel olaraq, Fransanın vasitəçilikdən çıxaraq açıq tərəf tutması, sülh müqaviləsinin imzalanmasını yubadan əsas səbəblərdən biri kimi də qəbul edilməlidir. Regionda sülh yalnız obyektiv, balanslı və beynəlxalq hüquqa söykənən yanaşma ilə mümkündür. Əks halda, bu cür siyasi şoular sülh prosesinə mane olmaqla qarşıdurma ritorikasına xidmət edəcək".
Ayhan
16:25 15.07.2025
Oxunuş sayı: 1144
