Xarici xəbərlər

İlon Maskın komandasından ayrılıq – X-in rəhbəri vəzifəsindən getdİ

Linda Yaccarino X-in rəhbərliyindən ayrıldı – Maskın komandasında dəyişiklik baş verdi.

Crossmedia.az xarici mediaya istinadən bildirir ki, Linda Yaccarino İlon Maskın sahibi olduğu X platformasının baş direktoru vəzifəsindən istefa verib. O, bu posta 2023-cü ilin iyun ayında təyin olunmuşdu və istefa xəbərini şəxsi paylaşımı ilə açıqlayıb.

Yaccarino bildirib ki, İlon Maska ona bu missiyanı etibar etdiyi üçün minnətdardır: “İfadə azadlığını qorumaq, şirkəti yenidən qurmaq və X-i Hər Şey Tətbiqinə çevirmək fürsəti mənim üçün unudulmaz oldu.” O, iki ili “möhtəşəm” dövr kimi dəyərləndirib. Mask isə onun gedişinə hələlik münasibət bildirməyib.

Yaccarino daha əvvəl NBCUniversal-da reklam rəhbəri olub və texnologiya şirkətlərinin təsiri fonunda bu qurumu uğurla idarə edib. X-ə o zaman qoşulmuşdu ki, reklamverənlər platformanı tərk edir, Mask isə işçi ixtisarlarını həyata keçirirdi.

İstefa Mask üçün çətin dövrdə baş verir. Tesla satışları aşağı düşür, o isə ABŞ Prezidenti Donald Trampla açıq siyasi qarşıdurma yaşayır və yeni partiya yaratmağı planlaşdırır.

Son olaraq, X platformasının daxilindəki süni intellekt sistemi Grok-un Hitleri müsbət dəyərləndirməsi ciddi tənqidə səbəb olub. xAI şirkəti isə bu paylaşımların “uyğunsuz” olduğunu və aradan qaldırılacağını bildirib.

🖨 Çap et

19:33 09.07.2025

Oxunuş sayı: 567