"MİQ sistemi şəffafdır, amma təkmilləşməyə ehtiyac var" - Rəy
Müəllim – bu, sadəcə bir peşə deyil, həyatın özüdür. O, cəmiyyətin gələcəyini formalaşdıran, insan qəlbinə nur, zehninə bilik işığı yayan müqəddəs bir şəxsiyyətdir. Bu səbəbdən də müəllim olmaq istəyənlərin seçim prosesi – yəni Müəllimlərin İşə Qəbulu (MİQ) imtahanları – yalnız biliklə deyil, həm də bu peşəyə münasibətlə ölçülməlidir.
Bəs hazırkı MİQ modeli bu tələbləri qarşılayırmı? Bu sualar ilə bağlı Crossmedia.az-a təhsil üzrə ekspert Rəşad Qardaşov aydınlıq gətirib.
Ekspertin sözlərinə görə, hazırda müəllimlərin işə qəbulu prosesi ümumilikdə əlçatan və şəffaf şəkildə təşkil olunub: “İstənilən namizəd – xüsusilə ucqar məktəblərdə müəllim kimi işləmək istəyən şəxs – imtahanda iştirak edə, lazımi balı toplayaraq təsnifata uyğun olaraq paytaxt və ya region məktəblərində fəaliyyətə başlaya bilər. Proqramlar, hazırlaşma istiqamətləri və sual nümunələri hər kəs üçün açıqdır. Bu, qəbul edilən bir sistemdir”.
“Yüksək bal toplayan müəllimlər regionlara yönləndirilməlidir”
Rəşad Qardaşov hesab edir ki, mövcud sistem təkmilləşdirilməlidir. Onun fikrincə, təkcə bal və ixtisas üzrə seçim yetərli deyil: “Daha məqsədəuyğun olardı ki, yüksək bal toplayan müəllimlər əsasən paytaxt məktəblərinə deyil, regionlara yönəldilsin. Onlara daha yüksək əməkhaqqı, bonus və stimullaşdırıcı vəsaitlər təklif edilsin. Bu, təhsilin ölkənin bütün bölgələrinə bərabər şəkildə yayılmasına xidmət edər. Çünki təhsil yalnız şəhər mərkəzlərində deyil, hər bölgədə keyfiyyətli olmalıdır”.
Ekspert həmçinin qeyd edir ki, bəzi şəxslər elmi-pedaqoji təcrübəsi, xarici təlimləri və dünyagörüşü ilə seçilir: “İstənilən halda müəllimlik üçün imtahan nəticəsi vacibdir. Bu sahədə müəyyən bir şablon yanaşma mövcuddur və bu yanaşma hamı üçün eyni tətbiq olunmalıdır. Eyni zamanda, yüksək mentorluq bacarığı, müasir dərs metodikası olan müəllimlər əlavə stimullarla mükafatlandırılmalıdır”.
Ekspertin təkliflərindən biri də konkret və rəsmi vəsaitlərin hazırlanmasıdır: “Şəhər məktəblərində çalışan namizədlər imtahanlara daha rahat hazırlaşa bilir. Amma düşünürəm ki, dövlət səviyyəsində – istər Dövlət İmtahan Mərkəzi, istərsə də aidiyyəti qurumlar tərəfindən – hər fənn üzrə rəsmi toplum hazırlanmalıdır. Namizəd bilməlidir ki, müəyyən bir status əldə etmək üçün hansı materiallardan hazırlaşmalıdır. Əlavə biliklər isə onun üstünlüyü kimi dəyərləndirilsin”.
Hazırkı MİQ sistemi ümumilikdə şəffaf və əlçatan olsa da, bəzi dəyişikliklərə ehtiyac duyulduğu görünür. Ekspertlər hesab edir ki, sistemə rəsmi tədris vəsaitlərinin əlavə olunması, yüksək bal toplayanların regionlara yönəldilməsi və xüsusi bacarıqlı müəllimlərin stimullaşdırılması gələcəkdə təhsilin keyfiyyətinə müsbət təsir göstərə bilər.
Mehriban Yariyeva
16:40 09.07.2025
Oxunuş sayı: 6389
