ABŞ dövlət katibinin səsi süni intellektlə saxtalaşdırıldı: Yüksək səviyyəli şəxslərlə əlaqə quruldu
ABŞ Dövlət katibi Marko Rubionun səsini süni intellekt vasitəsilə təqlid edən şəxs bir sıra yüksək vəzifəli şəxslərlə əlaqə qurmağa cəhd edib.
Crossmedia.az xəbər verir ki, “The Washington Post” nəşrinin məlumatına görə, şəxsiyyəti hələ müəyyən olunmayan bu şəxs ABŞ və xarici ölkələrdən ən azı beş yüksək vəzifəli şəxsə – o cümlədən iki xarici işlər naziri, bir ABŞ qubernatoru və bir konqres üzvünə səsli və yazılı mesajlar göndərib.
Məlum olub ki, saxtakar süni intellekt dəstəyi ilə Rubionun səsini və yazı tərzini təqlid edərək həm mətn, həm də səsli mesajlar göndərib. ABŞ Dövlət Departamentinin 3 iyul tarixli daxili yazışmalarına əsasən, bu şəxs həm SMS vasitəsilə, həm də Tramp administrasiyası dövründə geniş istifadə olunan Signal tətbiqi üzərindən əlaqə saxlayıb.
İstintaqa görə, saxtakar “[email protected]” adlı saxta e-poçt ünvanı ilə Signal hesabı yaradaraq iyunun ortalarından fəaliyyətə başlayıb. Qeyd olunur ki, bu e-poçt Rubionun rəsmi ünvanı deyil.
Departamentin sənədində bildirilir ki, həmin şəxs ən azı iki yüksək vəzifəli şəxsə Signal üzərindən səsli mesaj buraxıb, digər hallarda isə qısa mesajla əlaqə qurmağa cəhd edib. Eyni zamanda, digər dövlət departamenti əməkdaşlarının da e-poçtları saxtalaşdırılıb.
ABŞ Dövlət Departamenti bu məsələ ilə bağlı geniş araşdırma aparılacağını və gələcəkdə bu tip halların qarşısının alınması üçün əlavə tədbirlərin görüləcəyini açıqlayıb.
Hadisəyə dair suallara cavab olaraq, nə Dövlət Departamenti, nə də Federal Təhqiqat Bürosu (FBI) təqlidçinin kimliyi və ya hədəf alınan diplomatlarla bağlı açıqlama verməkdən imtina edib.
Berkeley Universitetindən rəqəmsal kriminalistika üzrə mütəxəssis professor Hani Farid qeyd edib ki, süni intellektlə bir şəxsin səsini təqlid etmək üçün cəmi 15–20 saniyəlik səs nümunəsi kifayətdir. Onun sözlərinə görə, Rubionun vəziyyətində bu proses xüsusilə asan olub: “Səsli mesajlar xüsusilə təsirlidir, çünki interaktiv deyil”.
Hədəf alınan şəxslərin bu mesajlara cavab verib-vermədiyi isə hələ də məlum deyil.
Mədinə Cəlilova
22:45 08.07.2025
Oxunuş sayı: 829
