Qəzzalılar Tramp və Netanyahunun köçürülmə planına etiraz edirlər
ABŞ Prezidenti Donald Trampın və İsrail Baş naziri Benyamin Netanyahunun Qəzza sakinlərinin bölgədən köçürülməsi ilə bağlı təklifləri yerli əhalinin və beynəlxalq insan haqları təşkilatlarının ciddi narahatlığına səbəb olub. 45 yaşlı texnik Mansur Əbu əl-Xeyr Qəzza şəhərinə baxanda yalnız dağıntılar və ölüm görsə də, vətənini tərk etməyin mümkünsüz olduğunu deyir: “Bu bizim torpağımızdır. Hara gedək, kimə buraxaq?”
Crossmedia.az xarici mediaya istinadən bildirir ki, Tramp və Netanyahu Ağ Evdə keçirdikləri görüşdə bəzi ərəb ölkələrinin Qəzza sakinlərini qəbul etməyə hazır olduqlarını iddia ediblər. Netanyahu bildirib ki, insanların qalmaq və ya getmək seçimi olmalıdır və Qəzza “bir həbsxana yox, açıq yerə” çevrilməlidir. Tramp isə “ətraf ölkələrin” bu məsələdə “çox yaxşı əməkdaşlıq” etdiyini qeyd edib.
Lakin BMT-nin insan haqları üzrə sözçüsü Ravina Şamdasani bu planın “məcburi köçürülmə” riski daşıdığını bildirib. Onun sözlərinə görə, Qəzzada baş verənlər fonunda könüllü köç konsepsiyası inandırıcı görünmür.
ABŞ Prezidenti Tramp hələ prezidentliyinin ilk günlərində İordaniya və Misiri Qəzzalıları qəbul etməyə çağırmış, bölgəni “Yaxın Şərqin Rivyerası”na çevirmək ideyasını irəli sürmüşdü. Lakin həm bu ölkələr, həm də fələstinlilər və insan haqları qrupları bu planı etnik təmizləmə cəhdi kimi qiymətləndiriblər.
27 yaşlı Qəzza sakini Saed isə bu xəbərlərlə oyananda narahatlıq keçirdiyini deyib. Artıq 20 aydan çoxdur müharibənin davam etdiyini vurğulayan Saed, dəfələrlə daxili köçkünə çevrilsə də, Qəzzaya bağlılığını qoruduğunu bildirib.
Fatimə Nəbiyeva
19:11 08.07.2025
Oxunuş sayı: 976
