Cənubi Koreya bütün vətəndaşlarına pul yardımı edəcək
Cənubi Koreya daxili istehlakı artırmaq və iqtisadi durğunluğu canlandırmaq məqsədilə bütün vətəndaşlara 150 min von (təxminən 110 dollar) dəyərində bir dəfəlik nağd yardım təqdim edəcək genişmiqyaslı proqram başladır.
Crossmedia.az xəbər verir ki, bu barədə “The Korea Herald”qəzetinin məlumat yayıb. Məlumata görə, gu təşəbbüs parlament tərəfindən cümə günü təsdiqlənən 31,8 trilyon von (23,3 milyard dollar) həcmində əlavə büdcənin bir hissəsidir. Proqram 21 iyulda başlayacaq və 12 sentyabra qədər davam edəcək.
Daxili İşlər nazirinin müavini Kim Min-ce bildirib ki, ödənişlərin istehlakı artırmaqla iqtisadi bərpaya töhfə verməsi və ehtiyacı olanlara dəstək olması üçün hazırlıqlar diqqətlə aparılır.
İyunun 18-nə qədər Cənubi Koreyada yaşayan bütün vətəndaşlara bu məbləğ bir dəfəlik şəkildə veriləcək. Ödənişlər kredit və ya bank kartları, əvvəlcədən ödənilən kartlar və ya yerli idarələr tərəfindən təqdim olunan hədiyyə çekləri vasitəsilə həyata keçiriləcək.
Əlavə yardımlar isə daha həssas təbəqələrə yönələcək. Yoxsulluq həddinə yaxın yaşayan ailələrə və tək valideynli ailələrə 300 min von (220 dollar), əsas sosial yardım alanlara isə 400 min von (290 dollar) ödənəcək. Kənd bölgələrində yaşayanlara isə regional inkişafı tarazlaşdırmaq məqsədilə əlavə 50 min von veriləcəyi açıqlanıb.
Proqramın ikinci mərhələsi çərçivəsində, 22 sentyabr – 31 oktyabr tarixləri arasında gəlir baxımından ən aşağı 90%-lik əhali qrupuna əlavə olaraq 100 min von (təxminən 73 dollar) yardım ediləcək.
Mədinə Cəlilova
21:00 06.07.2025
Oxunuş sayı: 680
