"Özbəkistanın Ermənistanla səfirliklər səviyyəsində diplomatik münasibətləri yoxdur" -Deputat
Azərbaycan ilə Özbəkistan arasında formalaşan münasibətlər təkcə siyasi və iqtisadi maraqlarla məhdudlaşmır, bu əməkdaşlıq dərin tarixi köklərə, ortaq mədəniyyətə və güclü mənəvi bağlara əsaslanır. Son illərdə bu iki qardaş ölkə arasında əlaqələr daha da intensivləşib, strateji tərəfdaşlıqdan stretji müttəfiqliq səviyyəsinə yüksəlib. Dövlət başçılarının iradəsi və qarşılıqlı etimada əsaslanan münasibətləri nəticəsində, ikitərəfli və çoxtərəfli formatda əməkdaşlıq genişlənməkdədir. Xüsusilə son zamanlar iqtisadi, diplomatik layihələrin miqyası böyüyüb, siyasi dialoq daha da güclənib və regionda davamlı sabitliyin təmin olunmasına töhfə verən praktiki addımlar atılıb. Bu münasibətlərin dərinliyi həm tarixi amillərlə, həm də ortaq gələcək vizyonu ilə izah olunur.
Mövzu ilə bağlı Milli Məclisin deputatı Rizvan Nəbiyev Crossmedia.az-a açıqlama verib: "Azərbaycan və Özbəkistan həm ikitərəfli, həm də çoxtərəfli formatda uğurlu əməkdaşlıq edir. Bunun əsasında isə dövlətlərimizi və xalqlarımızı birləşdirən ortaq dəyərlər, siyasi, iqtisadi, mədəni və humanitar sahələrdə üst-üstə düşən maraqlar, həyata keçirilməkdə olan layihələr dayanır. Digər çox vacib bir faktor isə Azərbaycan Respublikasının Prezidenti cənab İlham Əliyev və Özbəkistan Prezidenti cənab Şövkət Mirziyoyev arasında etimada əsaslanan açıq və səmimi dialoqun olmasıdır. Eyni zamanda, dövlətlər arasında siyasi və iqtisadi sahədə fəaliyyətin həyata keçirilməsi üçün müxtəlif mexanizmlərin mövcud olması real nəticələrə aparır."
Deputat həmçinin qeyd edib: "Ötən gün Bakıda Azərbaycan və Özbəkistan Dövlətlərarası Şuranın ikinci iclası baş tutdu. Bu, siyasi dialoqun həyata keçirildiyi vacib bir instansiyadır. Həmçinin iqtisadi sahədə əməkdaşlığın həyata keçirilməsi üçün Hökumətlərarası Komissiya fəaliyyət göstərir və nizamnamə kapitalı 500 milyon dollar olan İnvestisiya Fondu təsis olunub. Həmin çərçivədə 10-a yaxın layihənin həyata keçirilməsi planlaşdırılır. Azərbaycan Prezidenti cənab İlham Əliyevin də vurğuladığı kimi, bu, potensial imkanların reallaşdırılması qat-qat aşağı bir rəqəmdir. Bunu bir neçə dəfə artırmaq nəzərdə tutulub. Dinamik artımın təmini üçün isə təbii resurslar və obyektiv mühit mövcuddur. Nəzərə alsaq ki, Özbəkistan açıq dənizə çıxışı olmayan ölkədir və onun Avropaya çıxışında, Qərb ölkələrinin bazarlarına daxil olmasında Azərbaycanın yaratdığı loqitika-nəqliyyat infrastrukturunun əhəmiyyəti çox böyükdür. Təkcə ötən il Özbəkistan bir milyon ton məhsulunu Trans-Xəzər marşrutu, Orta Dəhliz vasitəsilə Avropaya ixrac edib. Nəzərə alsaq ki, Azərbaycanın yaratdığı infrastruktur çərçivəsində bu dəhlizin ötürmə qabiliyyəti 5 milyon tondur, deməli, bunun 20%-i Özbəkistanın üzərinə düşüb".
Rizvan Nəbiyev 44 günlük Vətən müharibəsi zamanı Özbəkistanın Azərbaycana siyasi və beynəlxalq hüquqa əsaslanan dəstəyindən də danışıb: "Torpaqlarımız işğal altında olarkən Özbəkistan Ermənistanda səfirlik açmayıb, Daşkənddə də Ermənistan səfirliyinin açılmasına imkan verilməyib. Bu, çox böyük bir faktordur. Torpaqlarımız işğal altında olanda da Özbəkistan Azərbaycanın ərazi bütövlüyünü müdafiə edib, 44 günlük müharibə dövründə də Özbəkistanın Azərbaycandakı Səfirliyi haqlı mövqeyimizi müdafiə edən bəyanat verib. Torpaqlarımız azad olunandan sonra isə, Prezidentimizin də vurğuladığı kimi, Özbəkistan ilk dövlət idi ki, öz vəsaiti hesabına bərpa və quruculuq işlərinə başladı".
Rizvan Nəbiyev həmçinin vurğulayıb ki, Türk Dövlətləri Təşkilatı çərçivəsində isə Özbəkistanın Azərbaycan-Türkiyə tandemindən ibarət motora yaxud lokomitivə qoşulması istiqamətində addımları müşahidə edirik. Bu amil isə çoxtərəfli formada uğurlu əməkdaşlığın dərinləşməsi üçün vacibdir və böyük perspektivi var.
Ayhan
19:50 03.07.2025
Oxunuş sayı: 7195
