Tarix yazan rəşadətli Azərbaycan ordusu
Hər il 26 iyun tarixində Azərbaycanda böyük bir qürur və fəxr hissi ilə qeyd olunan Silahlı Qüvvələr Günü,ordumuzun gücünü, xalqımızın vətənə bağlılığını və müstəqilliyimizi qorumaq əzmini simvolizə edir. Bu tarix 1918-ci ilin iyun ayına – Azərbaycan Xalq Cümhuriyyəti dövrünə gedib çıxır. Məhz 1918-ci il 26 iyunda AXC hökuməti tərəfindən ilk müntəzəm ordu – Azərbaycan Milli Ordusu yaradıldı. Bu, təkcə hərbi bir addım deyildi, həm də xalqın azadlıq uğrunda mübarizəsinin simvoluna çevrildi. Hərçənd ki, Cümhuriyyət cəmi 23 ay yaşadı, amma ordunun təməli qoyuldu və bu günkü güclü Azərbaycan Ordusunun bünövrəsi də həmin tarixdən başlayır.
Müstəqillik yenidən bərpa olunduqdan sonra, 1991-ci ildə Azərbaycan Respublikasının Silahlı Qüvvələri formalaşdırıldı. 1993-cü ildə isə Ulu Öndər Heydər Əliyevin sərəncamı ilə 26 iyun rəsmi olaraq Silahlı Qüvvələr Günü elan olundu. Bu gün artıq ölkənin ən önəmli bayramlarından biri sayılır.
Ən son və ən önəmli tarixlərdən biri isə, şübhəsiz, 2020-ci ilin Vətən müharibəsidir. 44 gün ərzində rəşadətli Azərbaycan Ordusu Ali Baş Komandan İlham Əliyevin rəhbərliyi ilə Qarabağda parlaq bir zəfərə imza atdı. Bu, təkcə hərbi qələbə deyildi – bu, 30 illik işğala son qoyan, ədalətin bərpa olunduğu bir tarix idi.Gənclər və ordu bizim qürur mənbəyimizdir.Bu gün Azərbaycan gəncliyi ordumuza dəstək göstərməkdə, hərbi xidmətə canla-başla qatılmaqda böyük maraq və fəxr hissi göstərir. Çünki orduya xidmət – təkcə borc deyil, həm də şərəfdir.Bugünkü Azərbaycan Ordusu təkcə say baxımından deyil, həm də texnologiya, hazırlıq və döyüş qabiliyyəti baxımından regionun ən güclü ordularından biri sayılır. Ordu sıralarında peşəkar zabitlər, hərbi təhsil almış gənclər və müasir texnika ilə silahlanmış bölmələr yer alır.Son illərdə ölkədə müdafiə sənayesinin inkişafı, yerli hərbi texnikanın istehsalı və beynəlxalq hərbi əməkdaşlıqlar bu sahəyə xüsusi önəm verildiyini göstərir. Bu, sadəcə ölkənin hərbi gücünü artırmaqla kifayətlənmir, eyni zamanda müstəqilliyimizin uzunmüddətli təminatına xidmət edir.Bu gün bizim vəzifəmiz – şəhidlərin qanı ilə yazılmış tarixi unutmamaq, orduya olan inamı daim diri saxlamaq və Vətəni göz bəbəyimiz kimi qorumaq, dövlətimizin,prezidentimizin ətrafında dəmir yumruq kimi birləşmək bizim vətəndaşlıq borcumuzdur.
Silahlı Qüvvələr Günü yalnız hərbçilərin bayramı deyil. Bu gün hər bir azərbaycanlının – istər əsgər, istər tələbə, istər müəllim – ürəyində Vətən sevgisinin alovlandığı gündür. Çünki vətənə xidmət təkcə səngərdə olmur – cəbhədə olduğu kimi arxa cəbhədə də xidmət var.
Elgün Rüstəmli
YAP Yasamal rayon təşkilatının gənc fəalı
15:30 23.06.2025
Oxunuş sayı: 3557
