Ordu Qüdrətimizdir, Qalxanımızdır
Ordu – sadəcə əsgərlərlə dolu bir qurum deyil, dövlətin ruhunu, xalqın iradəsini, vətənin şərəfini qoruyan canlı bir qüvvədir. Azərbaycanın müasir ordusu bu gün təkcə hərbi gücü ilə deyil, həm də mənəvi-ideoloji dayaqları ilə dünyaya nümunə göstəriləcək bir səviyyəyə çatıb. Bütün bu inkişafın, formalaşmanın, möhkəmlən-mənin bünövrəsində isə bir ad dayanır – Heydər Əliyev. Ulu Öndər Heydər Əliyev üçün ordu quruculuğu hər zaman strateji önəm daşıyan bir məsələ olub. 1969-cu ildə Azərbaycana rəhbərlik etməyə başladığı andan etibarən Heydər Əliyev milli hərbi kadrların hazırlanması prosesinə xüsusi diqqət yetirməyə başladı. O illərdə Azərbaycanda hərbi təhsil almaq, milli zabitlər hazırlamaq üçün demək olar ki, heç bir müstəqil infrastruktur yox idi. Amma Heydər Əliyev bu boşluğu dərin strateji baxış və siyasi iradə ilə doldurmağa başladı. 1971-ci ildə onun təşəbbüsü ilə görkəmli sərkərdə Cəmşid Naxçıvanskinin adını daşıyan hərbi lisey yaradıldı. Bu lisey sonrakı illərdə on minlərlə azərbaycanlı gəncin orduya, hərb sənətinə bağlanmasına və peşəkar zabit kimi formalaşmasına şərait yaratdı. Bununla da Azərbaycanın ordu tarixində yeni bir səhifə açıldı. Heydər Əliyev SSRİ rəhbərliyində təmsil olunduğu illərdə belə azərbaycanlı gənclərin hərbi təhsil almasına şərait yaratmaqdan heç vaxt vaz keçmədi. Onun səyləri nəticəsində yüzlərlə azərbaycanlı gənc Sovet İttifaqının müxtəlif hərbi məktəblərinə qəbul olundu.
Bu kadr potensialı gələcəkdə Azərbaycanın müstəqil ordusunun təməlini təşkil
etdi. 1991-ci ildə Azərbaycan müstəqilliyini bərpa etsə də, dövlətçilik
strukturlarının zəifliyi ölkənin təhlükəsizliyini ciddi təhdid altına saldı. Təəssüf
ki, müstəqilliyin ilk illərindəki xaos və səriştəsiz rəhbərlik nəticəsində ordu
quruculuğu prosesi iflic vəziyyətə düşmüşdü. Ermənistanın hərbi təcavüzü
fonunda Azərbaycanın ərazi bütövlüyü təhlükə altına düşdü. Ordunun olmaması,
başıpozuq silahlı dəstələrin çoxalması, fərqli qüvvələrin silahı öz maraqları
üçün istifadə etməsi ölkəni uçuruma aparırdı. Belə bir vəziyyətdə xalqın
ümidsizliyi artmağa başlamışdı. Amma 1993-cü ildə xalqın təkidli tələbi ilə
Heydər Əliyev yenidən siyasi hakimiyyətə qayıtdı. Onun qayıdışı ilə ölkədə
sabitlik bərpa olunmağa başladı və nizami ordu quruculuğuna start verildi.
2001-ci ildə peşəkar hərbi kadrların daha yüksək səviyyədə
hazırlanmasını təmin etmək məqsədilə hərbi təhsil sistemində köklü islahatlar
aparıldı və nəticədə Azərbaycan Ali Hərbi Məktəbi, Azərbaycan Hərbi Dənizçilik
Məktəbi və Azərbaycan Ali Hərbi Təyyarəçilik Məktəbi kimi ixtisaslaşmış ali hərbi
təhsil müəssisələri formalaşdırıldı. Bütün bu islahatların kökündə bir məqsəd
dayanırdı – güclü, milli, mütəşəkkil, döyüşkən ordu formalaşdırmaq.
Ulu Öndər ordunu dövlətçiliyin dayağı, xalqın ümid
yeri hesab edirdi.O, deyirdi: “Gənclər orduda xidmət etmək üçün tərbiyələndirilməlidir”.
Bu fikrin özü milli ruhun, vətəndaşlıq şüurunun formalaşması üçün bir çağırış
idi.Silahlı Qüvvələrə olan bu qayğı sonrakı illərdə daha da artdı. Ali Baş
Komandan kimi Prezident İlham Əliyev də bu siyasi kursu uğurla davam etdirdi.
Bu davamlılıq nəticəsində Azərbaycan ordusu regionun ən güclü ordularından
birinə çevrildi.
44 günlük Vətən müharibəsində bu güc özünün real təzahürünü
tapdı. Azərbaycan Ordusu 30 ilə yaxın düşmən işğalında qalan torpaqları qəhrəmancasına
azad etdi. Bu zəfər həm də Heydər Əliyev siyasətinin, onun ordu quruculuğu
strategiyasının parlaq nəticəsi idi. Zəfər yürüşündə iştirak edən hər bir əsgərin
timsalında Heydər Əliyevin ruhu, ideyası və məktəbi vardı. Bu gün də Azərbaycan
ordusu regionda sülhün, təhlükəsizliyin, ədalətin təminatçısı kimi çıxış
edir.Ən müasir texnologiyalarla təchiz olunan, milli ideologiya ilə silahlanan
bu ordu təkcə ölkənin deyil, həm də Türk dünyasının güvən yeridir. 26 İyun bizə
ordumuzun gücünü, qüdrətini və mənəvi böyüklüyünü xatırladır. Bu gün biz həm də
hərbçilərimizin fədakarlığını, Vətənə sədaqətini, şərəfli xidmətini qeyd
edirik. Hərbi xidmət bu gün gənclər üçün vətənpərvərlik məktəbinə çevrilib. Azərbaycan
gənci fəxrlə orduya yollanır, çünki bilir ki, bu ordu məhz xalqın ordusudur. Hərbi
təlimlərdən tutmuş beynəlxalq sülhməramlı missiyalara qədər hər sahədə uğurlar əldə
olunub. Azərbaycan ordusu yalnız döyüş meydanında deyil, eyni zamanda humanitar
missiyalarda da nümunəvi mövqe tutur.
Məhz bu da ordu quruculuğunun kompleks yanaşmasının
göstəricisidir. Bugünkü Silahlı Qüvvələr Heydər Əliyev irsinin canlı davamıdır.
Bu ordu təkcə torpaqlarımızı deyil, həm də milli ruhumuzu qoruyur. 26 İyun
tarixi dövlətin, xalqın və ordunun birliyinin rəmzidir. Bu birlik sarsılmaz
olduqca Azərbaycan daha da güclənəcək. Ordumuzun hər bir uğuru, hər bir zəfəri
bizə Vətənin dəyərini daha dərindən anlatır. Ordumuz varsa, sabahımız var!
Ordumuz güclüdür, çünki xalqına arxalanır! Xalq da
qürurludur, çünki arxasında güclü ordusu var! Bu gün Azərbaycan xalqı orduya
güvənir, ordusu ilə fəxr edir. Biz bu güvəni Heydər Əliyevin uzaqgörən siyasətinə,
möhkəm iradəsinə və dövlətçilik fəlsəfəsinə borcluyuq.
Yaşasın Azərbaycan Ordusu!
Yaşasın Azərbaycan!
Qoy bu gün gələcək nəsillər üçün həm qəhrəmanlıq dərsi,
həm də milli iradənin təntənəsi olsun!
Fərid Mustafayev
YAP Yasamal
rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi
partiya təşkilatının sədr müavini
10:52 23.06.2025
Oxunuş sayı: 4117
