Xarici xəbərlər
Pezeşkian: "İsrail təcavüzü davam etdirərsə, daha sərt cavab veriləcək"
İran Prezidenti Məsud Pezeşkian İsrailin hərbi təcavüzü davam etdirəcəyi təqdirdə, İran Silahlı Qüvvələrinin daha sərt və qətiyyətli cavab verəcəyini bəyan edib.
Crossmedia.az İRNA-ya istinadən xəbər verir ki, bu fikirləri Pezeşkian Pakistanın Baş naziri Şahbaz Şəriflə telefon danışığı zamanı səsləndirib.
Dövlət başçısı İsrailin ABŞ və müttəfiqlərinin birbaşa dəstəyi ilə həyata keçirdiyi hücumları qınayıb, bölgədə sabitliyi pozan bu addımların beynəlxalq hüququn və insan haqlarının kobud şəkildə pozulması olduğunu vurğulayıb.
İran Prezidenti Qərb ölkələrini İsrailə siyasi dəstək verməklə yanaşı, hərbi texnika və silah-sursatla da təchiz etməkdə ittiham edib.
O qeyd edib ki, bu yanaşma beynəlxalq ictimaiyyətin “insan haqları müdafiəçisi” iddialarını şübhə altına alır:
“Müharibənin belə qaydaları var, lakin İsrail rejimi bu prinsipləri açıq şəkildə tapdalayır. Əgər biz bu cinayətkar və uşaq qatili rejimə qarşı özümüzü müdafiə etməsəydik, torpaqlarımıza ardıcıl təcavüz və alimlərimizin hədəfə alınması davam edəcəkdi. Biz onların ‘toxunulmaz’ hesab etdikləri texniki avadanlıqlarını məhv etməklə göstərdik ki, bu rejimin gücü mifdən ibarətdir”.
Pezeşkian, eyni zamanda, ABŞ və İsrail arasında İran ərazisinə qarşı keçirilmiş hücumlarda nümayiş olunan koordinasiyanı danışıqlar prosesinin etibarlılığına ciddi zərbə kimi qiymətləndirib. O bildirib ki, bu cür addımlar İranın öz müdafiə imkanlarını gücləndirməsinin zəruriliyini bir daha ortaya qoyur.
Telefon danışığı zamanı İran Prezidentinin Pakistanın BMT Təhlükəsizlik Şurasında nümayiş etdirdiyi mövqeyə görə minnətdarlıq etdiyi də bildirilir.
Öz növbəsində, Pakistanın Baş naziri Şahbaz Şərif İsrailin İrana qarşı həyata keçirdiyi hücumu beynəlxalq hüququn pozulması kimi dəyərləndirib və baş vermiş hadisələr zamanı həyatını itirən iranlı alimlər, dövlət rəsmiləri və mülki şəxslərlə bağlı başsağlığı verib.
Ş.Şərif həmçinin Həcc ziyarətindən qayıdan iranlı zəvvarların təhlükəsiz və rahat şəkildə ölkəyə dönüşünün təmin olunması üçün Pakistan tərəfinin əməkdaşlığa hazır olduğunu bildirib.
22:36 14.06.2025
Oxunuş sayı: 4062
