İran hücumlara reaksiya verdi: “Əsas nüvə obyektlərinə zərər dəyməyib”
İsrailin nüvə obyektlərinə hücumları ciddi zərər verməyib.
Crossmedia.az İRNA-ya istinadən xəbər verir ki, bunu İran Atom Enerjisi Təşkilatının (AEOİ) sözçüsü Bəhruz Kamalvəndi deyib.
O, yerli mediaya açıqlamasında qeyd edib ki, Natanz, Fordo və İsfahan şəhərlərində yerləşən obyektlərə endirilən zərbələr yalnız səthi və məhdud ziyanla nəticələnib.
Kamalvəndinin sözlərinə görə, əvvəlcədən görülən ehtiyat tədbirləri nəticəsində əsas texniki avadanlıqlar və strateji materiallar təhlükəsiz şəkildə qorunub.
“Əsas kritik komponentlər və nüvə materiallarının əhəmiyyətli hissəsi əvvəlcədən təhlükəsiz binalara köçürülmüşdü. Bu səbəbdən hər hansı bir ciddi itki qeydə alınmayıb”, – AEOİ sözçüsü əlavə edib.
O bildirib ki, zərər çəkən obyektlərdə bərpa işlərinə başlanılıb və bu proses İranın nüvə infrastrukturunun təkmilləşdirilməsinə müsbət təsir göstərəcək.
Xatırladaq ki, ötən cümə gecəsi İsrail ordusu İranın bir neçə şəhərində, o cümlədən Tehranda yerləşən hərbi və strateji obyektlərə hava hücumları təşkil edib.
Yerli mənbələrə görə, hücumlar zamanı yalnız nüvə obyektləri deyil, həmçinin yüksək rütbəli hərbi komandirlər də hədəfə alınıb.
Nəticədə, İran Silahlı Qüvvələrinin Baş Qərargah rəisi general-mayor Məhəmməd Baqeri və SEPAH-ın Baş Komandanı general-mayor Hüseyn Səlami də daxil olmaqla, bir neçə yüksək rütbəli şəxs həlak olub.
21:22 14.06.2025
Oxunuş sayı: 9636
