Taksi sürücülərindən sərnişinlərə sayğısızlıq: Hər an yolda qala bilərik...
İctimai nəqliyyatla bağlı problem bitib- tükənmək bilmir. Sərnişinləri ən çox narahat edən məqamlardan biri də taksi sürücülərinin sifarişin ləğv olunması tələbi ilə bağlıdır. Bəli, məhz tələb. Məsələ burasındadır ki, sərnişinin sorğusunu qəbul edən sürücü bir neçə dəqiqədən sonra zəg edir. Biz sürücünün "çatdım, sizi gözləyirəm" xəbərini eşidəcəyimizi güman etdiyimiz halda, "sifarişi ləğv edin" tələbi ilə üzləşirik. Bunu bəzən sərt, bəzən də yumşaq formada deyirlər. Bəzən də tıxacı, gec çatacaqlarını bəhanə göstərirlər. Hələ yolda dayanıb, ünvana doğru hərəkət etməyərək səbrimizi sınayan, əsəblərimizlə oynayan sürücüləri demirəm.
Sual yaranır: əgər belədirsə, niyə sorğunu qəbul edirsiz? Axı yollardakı durumdan da, qiymətdən də az- çox xəbərdarsız? Kim sizi məcbur edir sorğunu qəbul etməyə? Əslində cavab aydındır: sürücülər özlərinin reytinqi naminə sifarişi qəbul edirlər. Başa düşürlər ki, ləğv etmək onların reytinqini aşağı salacaq. Ona görə də bunu sərnişindən istəyirlər. Halbuki bu zaman sərnişinin reytinqi aşağı düşür? Şirkət avtomomatik olaraq ya qiyməti qaldırır, ya da sərnişini bloka atır. Beləliklə, ya ən yaxşı halda daha çox pul ödəməli oluruq. Ən pis halda isə yolda qalırıq. Üstəlik də, əsəb, stress...
Bu məsələ barədə Crossmedia.az-a danışan nəqliyyat eksperti Elməddin Muradlı bu cür halların nəqliyyat xidmətlərinə olan ictimai etimada ciddi zərbə vurduğunu deyib və məsələ ilə bağlı konkret tədbirlərin vacibliyini vurğulayıb: “Bu, taksi sürücülərinin sərbəst və özbaşına yanaşmasıdır. Belə hallar daşıma xidmətində neqativ situasiyaların yaranmasına gətirib çıxarır. Məsələ ilə bağlı Azərbaycan Yerüstü Nəqliyyat Agentliyi (AYNA) 144 nömrəli qaynar xətt yaradılıb. Vətəndaşlara tövsiyə olunur ki, belə hallarla üzləşdikdə qaynar xəttə məlumat versinlər.”
E. Muradlı əlavə edib ki, bəzi sürücülər ya qısa məsafəyə getmək istəmədiklərinə, ya da qiymətin aşağı olduğunu əsas gətirərək sifarişi ləğv etdirmək istəyirlər: “Əgər sürücü sifarişi yerinə yetirmək istəmirsə, bunu açıq şəkildə özü ləğv etməlidir. Müştərini buna məcbur etmək düzgün deyil və bu, bizim yanaşmamızla uzlaşmır.”
Zəhra Ağayeva
14:23 09.06.2025
Oxunuş sayı: 1102
