“Piylənməyə Qarşı Sağlam Həyat” - layihəsinin təqdimatı keçirilib
Sağlam həyat tərzinin təbliği məqsədilə “Piylənməyə Qarşı Sağlam Həyat: Velo Hərəkəti ilə Yeni Nəfəs” adlı layihə çərçivəsində tədbir təşkil olunub.
“İnnovativ media" Jurnalistlərin peşəkarlığının artırılmasına dəstək İctimai Birliyinin təşəbbüsü ilə keçirilən bu tədbirdə sosial çarxın təqdimatı olub və iştirakçılar mövzu ətrafında fikir mübadiləsi aparıblar.
Crossmedia.az xəbər verir ki, Sosial çarx Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə hazırlanıb. Məqsəd piylənmə ilə mübarizə aparmaq və sağlam həyat tərzini təşviq etmək üçün velosiped istifadəsini populyarlaşdırmaqdır. Layihə, fiziki aktivliyi artıraraq piylənmədən qaynaqlanan sağlamlıq problemlərinin qarşısını almağı, ətraf mühitin qorunmasına töhfə verməyi və fərdlərin fiziki rifahını yaxşılaşdırmağı hədəfləyir. Eyni zamanda velosiped sürmənin həm əyləncəli, həm də əlçatan bir idman növü olduğu göstərilir.
Tədbiri açılış nitqi ilə açan layihə rəhbəri Aynur Nəsirova layihənin vacibliyindən danışdı və bildirdi ki, sağlam həyat tərzinin təbliği mediada önəmli mövzulardan biridir.Ardınca iştirakçıları məlumatlandırmaq məqsədilə videorolik izləndi.
Sonra işçi qrupunun üzvü Loğman Avaz tələbələrin videoroliklə bağlı fikirlərini dinlədi. Videoçarxın məqsədi insanları sağlamlığa diqqət yetirməyə çağırmaq, şəhərdə velosiped sürmək üçün şəraitin olduğunu göstərmək və sağlam həyat tərzinin vacibliyini izah etmək idi.
Tədbirdə iştirak edən media mütəxəssisləri Afaq Sadıqova, Xatirə Hüseynova isə layihəni yüksək qiymətləndirərək, bu cür təşəbbüslərin medianın maarifləndirmə funksiyasını uğurla yerinə yetirdiyini vurğuladılar.
Müzakirələr zamanı İctimai Televiziyanın “Sabaha saxlamayaq” verilişinin redaktoru Nüşabə Hüseynova da çıxış edərək mövzu ilə bağlı təkliflərini səsləndirdi, medianın ictimai sağlamlığa töhfəsindən danışdı.
Tədbirin sonunda Aynur Nəsirova və Loğman Avaz tədbirin uğurlu və faydalı olduğunu vurğuladılar. Onlar iştirakçılara təşəkkür edərək, bu fəaliyyətlər sağlam həyat tərzini təşviq etməklə yanaşı, ətraf mühitin qorunmasına və cəmiyyətə sosial təsirlərin yaxşılaşdırılmasına töhfə verəcəyini bildirdilər.
18:57 30.05.2025
Oxunuş sayı: 1433
