Sosioloq valideynlərə səsləndi: "Bu işin sonunda ölüm var"
Baş Dövlət Yol Polisi İdarəsi mayın 29-da sürücülərə müraciət edib. Bildirilib ki, dəfələrlə xəbərdarlıq edilməsinə baxmayaraq, hələ də azyaşlıları avtomobilin ön oturacağında daşıyan, hərəkət zamanı onları nəzarətsiz qoyan, yaxud qucağında körpə uşaqla avtomobil idarə edən sürücülərə rast gəlinir.
Qeyd olunub ki, belə sürücülər ekstremal vəziyyətlərdə aciz qalacaqlarını bildikləri halda, təhlükədən xəbərsiz, özlərini qorumaq iqtidarında olmayan uşaqların həyatını riskə atdıqlarını sanki unudurlar:
"Qanun isə tələb edir ki, minik avtomobillərində uşağı saxlayan xüsusi qurğu olmadıqda 12 yaşınadək uşaqları ön oturacaqda, habelə 3 yaşınadək uşaqları onların yanında bir nəfər böyük müşayətçi olmadıqda arxa oturacaqda daşımaq qadağandır və belə hallar inzibati məsuliyyət yaradır".
Baş Dövlət Yol Polisi İdarəsi sadalanan qaydaların gələcəyimiz olan uşaqların təhlükəsizliyinə hesablandığını bir daha xatırladır və həmin tələbləri pozmaqla bədbəxt hadisələrə rəvac verən sürücüləri yaşanmış acı təcrübələrdən düzgün nəticə çıxarmağa çağırır.
Əslində bu poblem uzun müddətdir davam edir. Nədənsə bəzi valideynlər sükanı övladları ilə birlikdə idarə etməyə maraqlı olurlar. Beləliklə, həm onların özləri, həm də uşaqlarının həyatı üçün təhlükə yaranır.
Bu tendensiya barədə Crossmedia.az-a danışan sosioloq Lalə Mehralı bildirib ki, bir insan valideyn kimi öz məsuliyyətinin fərqində deyilsə, o təbii olaraq sürücü kimi də öz məsuliyyətini dərk etməyəcək: "Biz öz övladımızı necə qoruyuruq, necə hər şeydən qorumağa, mühafizə etməyə çalışırıq, bunu avtomobil daxilində də etməliyik. Biz sözün əsl mənasında valideyniksə, avtomobili uşaq qucağımızda idarə etməməliyik. Fərqində olmalıyıq ki, bu işin sonunda ölmək, öldürmək, əlil qalmaq, qəza törətmək var. Bütün hallarda bu işin sonunda peşmanlıq ehtimalı var. Əgər valideyn kimi bu məsuliyyəti dərk etmirlərsə, insanlar sürücü kimi də dərk etməyəcək. Odur ki, belə vəziyyətdə böyük məbləğdə cərimələr tətbiq edilməlidir ki, insanlar fərqində olsun. Biz millət olaraq cərimələnmədiyimiz hallarda məsuliyyətimizi dərk etmirik. Bizi yollarda məsuliyyətli olmağa məcbur edən vasitənin adı cərimədir".
Sosioloq hətta kamera olmayan yerlərdə bəzi insanların istədiyini etdiklərini, yol nişanı olmayan yerlərdə istədiyi hərəkəti etdiyini və öz məsuliyyətinin fərqində olmadığını bildirib: "Əgər yolda nəzarət sistemi yoxdursa, istədiyimizi edirik təəssüf ki. Çünki bizim üçün cərimənin olmadığı yerdə qayda-qanuna əməl etmək əhəmiyyətli deyil. Bu vəziyyətdə də əgər şəxs qucağına uşaq alıb maşın idarə edirsə, böyük məbləğdə cərimə tətbiq edilməlidir ki, müdafiəyə ehtiyacı olan və özünü qorumaq iqtidarında olmayan azyaşlının həyatını təhlükəyə atır. Bu səbəbdən də cərimə olunmalıdır".
L. Mehralı azyaşlılara maşın vermə məsələsinə də toxunub: "Qarşıdan son zəng gəlir. Sürücülük hüququ olmayan azyaşlılar yollarda qəza törədir. Valideynlər fərqində deyillər ki, hər il son zəng qana bulaşır. Son zəng ərəfəsində hər il qəza, ölmə, öldürmə, xəsarət xəbəri yayılır. Nədir bunun səbəbi? O avtomobili valideyn uşağa verməsə, o uşaq haradan alıb sürəcək? Xüsusilə rayon yerlərində azyaşlıların avtomobil sürməsi məsələsinə ciddi formada nəzarət etmək şərtdir. Şahidəm ki, 8-10 yaşlı uşaqlar bu gün rayonlarda avtomobil idarə edirlər".
Fatimə Məmmədova
12:19 30.05.2025
Oxunuş sayı: 871
