Səudiyyə Ərəbistanında diasporun təşkilatlanması uğurla davam edir
Diasporla İş üzrə Dövlət Komitəsinin sədri Fuad Muradov Səudiyyə Ərəbistanı Krallığında Azərbaycan icması ilə keçirilən geniş və səmimi görüş barədə Diaspor TV-yə açıqlama verib.
Crossmedia.az açıqlamanı təqdim edir:
Komitə sədri Fuad Muradov bildirib: "Bu bölgədə yaşayan azərbaycanlılar bizim digər soydaşlarımızdan fərqlənmir. Burada əsasən müəyyən ixtisaslar üzrə, daha çox həkimlər və neft sənayesində çalışanlar fəaliyyət göstərirlər. Bizim bu bölgəyə ilk səfərimiz 2019-cu ildə oldu".
Sədr daha sonra qeyd edib:“Bugün siz də gördünüz ki, möhtərəm cənab Prezidentin diaspora siyasətinə verdiyi dəstək vurğulandı. Nəticələr göz qabağındadır. Burada azsaylı təşkilatlanma olsa da, digər ölkələrdən gələn və bizim koordinatorlarımızın iştirakı ilə, səkkiz ölkədən icma nümayəndələri buradadır. Bildirmək istəyirəm ki, son illər ərzində həm dövlətin diaspora siyasətinə, həm də Komitənin həyata keçirdiyi iri layihələrə bizim soydaşlarımız çox fəal şəkildə qatılırlar".
Fuad Muradov bildirib: “Təşkilatlanma prosesi artıq tamamlanıb və bu gün burada konkret istiqamətlər müzakirə olundu. Məsələn, Azərbaycan evinin açılması, böyüyən nəsil üçün Azərbaycan dili və mədəniyyəti ilə bağlı layihələrin davamlı şəkildə həyata keçirilməsi məsələləri gündəmə gətirildi".
Sədrin sözlərinə görə, bu bölgədə yaşayan soydaşlarımızın təşkilatlanması çox qənaətbəxşdir və onlar Azərbaycan dövlətinin yanındadırlar: "Bu da möhtərəm cənab Prezidentin diaspora siyasətinin nəticəsidir ki, dünya üzrə soydaşlarımız Azərbaycanı fəal şəkildə təbliğ edirlər. İnanıram ki, bu görüşlərin bəhrəsi, eləcə də əvvəlki görüşlərin nəticəsi kimi, daha da böyük və təşkilatlanmış diasporaya gətirib çıxaracaq".
Fuad Muradov təkliflərin reallığı ilə bağlı sualı belə cavablandırıb: “Burada spesifik yanaşmalar mövcuddur. Siz bilirsiniz ki, hər ölkənin qanunvericiliyinə görə diaspora təşkilatları fəaliyyət göstərir. Bizim buna dair təcrübəmiz var. Məsələn, Mərakeşdə Azərbaycan Dostluq Cəmiyyəti yaradılıb. Burada belə bir təklif də səsləndi və mən düşünürəm ki, bunun üzərində işləmək olar".
Sədr əlavə edib ki, görüşdə Azərbaycan mədəniyyətinin təbliği ilə bağlı da fikirlər səsləndirildi: "Düşünürəm ki bu təkliflər realdır. Azərbaycan dili və rəqs dərslərinin açılması da müzakirə olundu. Bu da Komitənin son illərdə həyata keçirdiyi işlərin davamıdır. Yəni bu məsələlərə ciddi yanaşılır və həyata keçirmək mümkündür".
Fuad Muradov onu da bildirib ki, artıq bölgələr üzrə azərbaycanlıların yaşadığı yerlərin siyahısı mövcuddur. Demək olar ki, bir çox bölgələrdə azərbaycanlılar yaşayırlar, işləyirlər. Bu baxımdan onların fəaliyyətinə uyğun olaraq Diaspora Komitəsi xüsusi yol xəritəsi hazırlayacaq.
Sədr vurğulayıb ki, lazım olan istiqamətlər müəyyənləşdikdən sonra Komitə yerli azərbaycanlı icmaya dəstək verəcək.
Fuad Muradov əlavə edib ki, burada Azərbaycan səfirliyinin də çox böyük fəaliyyəti var və gələcəkdə bu istiqamətdə birgə çalışmalar göstəriləcək.
O, bu cür görüşlərin diasporanın daha da güclənməsinə və təşkilatlanmasına səbəb olacağını bildirib.
Fatimə Nəbiyeva
19:05 24.05.2025
Oxunuş sayı: 14076
