Google tarixi məhkəmə prosesində parçalanmaq təhlükəsi ilə üz-üzədir
ABŞ Ədliyyə Nazirliyinin tələbi ilə Google-a qarşı açılan tarixi məhkəmə prosesi bu həftə başladı. Üç həftə davam edəcək məhkəmə iclaslarında Google-un qanunsuz inhisar olub-olmadığı müzakirə edilir və şirkətin müxtəlif bölmələrə ayrılması məsələsinə qərar veriləcək.
Crossmedia.az xarici mediaya istinadən bildirir ki, bu prosesdən əvvəl ABŞ-da bir hakim Google-un, xüsusilə reklam texnologiyaları sahəsində, “qanunsuz inhisar” qurduğunu hökm etmişdi.
Google isə daha yumşaq addımlarla ABŞ hökumətinin inhisarçılıq narahatlıqlarını aradan qaldıra biləcəyini sübut etməyə çalışır.
Ədliyyə Nazirliyinin təklifləri arasında populyar internet brauzeri Chrome-un satılması da var. Hökumət iddia edir ki, Chrome istifadəçiləri avtomatik olaraq Google Axtarış xidmətinə yönləndirərək şirkətə haqsız üstünlük qazandırır. Chrome-un hazırda qlobal brauzer bazarının təxminən 66%-nə sahib olduğu bildirilir.
Bloomberg-in məlumatına görə, OpenAI şirkətinin məhsul rəhbəri Nik Turley Chrome-un satışa çıxarılacağı halda brauzeri almaq istədiklərini bildirib. Perplexity adlı başqa bir süni intellekt şirkətinin nümayəndəsi Dmitri Şevelenko da Chrome-a maraq göstərdiklərini açıqlayıb. Eyni zamanda, Google-un qədim rəqibi Yahoo da Chrome-un alıcıları arasında yer almaq istəyir. Yahoo Axtarış üzrə baş direktor Brian Provost, internet axtarışlarının təxminən 60%-nin brauzerlər vasitəsilə aparıldığını bildirib və bu sahəyə maraqlarını vurğulayıb.
Ədliyyə Nazirliyinin digər tələbləri arasında Google-un rəqib şirkətlərlə bəzi istifadəçi məlumatlarını paylaşması və cihaz istehsalçılarına yalnız öz süni intellekt köməkçisi Gemini-dən istifadə etmələri üçün ödəniş etməsinin qarşısının alınması da var. Nazirlik həmçinin, Android əməliyyat sisteminin satılması yerinə, Google-un bəzi xidmət paketlərinin parçalanmasını təklif edir. Əgər bu plan təsdiqlənərsə, üçüncü tərəf istehsalçılar Google-un əvvəlcədən yüklənmiş proqramları olmadan Android cihazlarını bazara çıxara biləcəklər.
Fatimə Nəbiyeva
15:10 26.04.2025
Oxunuş sayı: 963
