Trampın təzyiqi nəticə verdi: NATO ölkələrinin 22-si müdafiə xərclərini artırdı
NATO-nun yeni hesabatına görə, üzv dövlətlərin əksəriyyəti müdafiə xərclərini artıraraq ÜDM-in ən azı 2 faizini orduya yönəltmək öhdəliyini yerinə yetirib.
Crossmedia.az xarici KİV-ə istinadən xəbər verir ki, ABŞ prezidenti Donald Trampın təzyiqləri və xəbərdarlıqları bu artımda mühüm rol oynayıb.
2024-cü ildə NATO ölkələrinin hərbi xərclərində 19,4 faiz artım qeydə alınıb. Ümumi daxili məhsulun (ÜDM) 2 faizini müdafiəyə ayırmaq hədəfini 22 ölkə yerinə yetirib. Trampın hələ prezidentliyi dövründə etdiyi sərt çıxışlardan sonra NATO-nun bu məsələni prioritetə çevirdiyi vurğulanır.
Müdafiə xərclərinə ÜDM-in 4,07 faizini ayıran Polşa siyahıya başçılıq edir. Siyahının növbəti pillələrində Estoniya, Latviya, ABŞ, Litva və Yunanıstan qərarlaşıb. Türkiyə isə bu il müdafiəyə ÜDM-in 2,09 faizini ayıraraq hədəfi keçən ölkələr sırasına daxil olub. Bu göstərici ötən illə müqayisədə az olsa da, 2 faiz baryerinin üzərindədir.
Almaniya, Böyük Britaniya, Danimarka, Norveç, İsveç, Finlandiya, Çexiya, Rumıniya, Macarıstan və Hollandiya da hədəfi keçən ölkələr sırasındadır. Fransa və Bolqarıstan 2 faiz səviyyəsini ötərkən, Slovakiya bu həddə çatan ölkə kimi qeydə alınıb.
Əksinə, Monteneqro, İtaliya, Portuqaliya, Belçika, Lüksemburq, Sloveniya və Kanada 2 faiz hədəfinə çatmayıb. İspaniya isə müdafiə xərclərinə ÜDM-in cəmi 1,24 faizini ayırmaqla siyahının sonunda qərarlaşıb.
Qeyd edək ki, Rusiyanın Ukraynaya qarşı genişmiqyaslı təcavüzündən sonra NATO ölkələri ordularını yenidən silahlandırmaq və hərbi hazırlığı gücləndirmək istiqamətində ciddi addımlar atmaqdadır. Müdafiə xərclərinin gələcək mərhələdə əvvəlcə 3 faizə, daha sonra isə 5 faizə qədər artırılması nəzərdə tutulur.
22:47 25.04.2025
Oxunuş sayı: 729
