Braziliyanın sabiq prezidenti həbs edildi
Braziliyanın sabiq dövlət başçılarından Fernando Collor de Mello, korrupsiya ittihamı ilə barəsində çıxarılan həbs cəzasının icrasına qərar verilməsinin ardından ölkənin şimal-şərqində yerləşən Maceio şəhərində saxlanılıb.
Crossmedia.az Brazilya mətbuatına istinadən xəbər verir ki, Collor de Mello 2023-cü ildə “korrupsiya və çirkli pulların yuyulması” ittihamı ilə 8 il 10 ay müddətinə azadlıqdan məhrum edilmişdi. Braziliya Ali Məhkəməsi keçən həftə onun hökmə etdiyi etirazı rədd edərək cəzanın icrasına başlanmasına qərar verib.
Sabiq prezidentin vəkili Marcelo Bessa müvəkkilinin yerli vaxtla səhər saat 04:00 radələrində paytaxt Braziliyaya doğru yola çıxarkən saxlanıldığını açıqlayıb. Vəkilin sözlərinə görə, Collor de Mello Ali Məhkəmə hakimi Alexandre de Moraes tərəfindən verilmiş həbs qərarına tabe olaraq təslim olmaq üçün paytaxta getməyi planlaşdırırdı.
Hazırda sabiq prezidentin Alagoas ştatının paytaxtı Maceioda federal polis tərəfindən nəzarətdə saxlanıldığı bildirilib.
Fernando Collor de Mello, Braziliyada 1985-ci ildə hərbi diktaturanın sona çatmasından sonra xalq səsverməsi ilə seçilən ilk dövlət başçısı olmuşdu. 1990-cı ildə prezident vəzifəsinə başlayan Collor, iki il sonra başqa bir korrupsiya qalmaqalı səbəbilə parlament tərəfindən vəzifədən uzaqlaşdırılmışdı. 1994-cü ildə həmin iş üzrə Ali Məhkəmə tərəfindən bəraət almışdı.
2023-cü ildə Petrobras dövlət neft şirkətinin törəmə müəssisələrindən biri vasitəsilə təxminən 5,28 milyon dollar rüşvət almaqda təqsirləndirilən Collor, Ali Məhkəmənin təsdiqlədiyi hökmə əsasən həbs ediləcək. Prezidentlik dövründən sonra Alagoas ştatından senator seçilən Collor, 2023-cü ilin əvvəlində parlamentdən ayrılmışdı. O, son olaraq Alagoas valiliyi uğrunda mübarizə aparmış, lakin seçkini uduzmuşdu.
Mədinə Cəlilova
20:40 25.04.2025
Oxunuş sayı: 754
