AMEA-da görkəmli azərbaycanlı türkoloq alim Cavad Heyətin 100 illiyinə həsr olunmuş elmi konfrans keçirilib
Aprelin 25-də AMEA-nın Fəlsəfə və Sosiologiya İnstitutunda görkəmli cərrah, türkoloq, “Varlıq” jurnalının təsisçisi Cavad Heyətin anadan olmasının 100 illiyinə həsr olunmuş “Milli varlığa və mənəviyyata həsr edilən ömür – Cavad Heyət fenomeni” mövzusunda respublika elmi konfransı keçirilib.
Konfransı AMEA-nın prezidenti, akademik İsa Həbibbəyli açaraq Cavad Heyətin həyat və yaradıcılığı haqqında geniş məlumat verib. O bildirib ki, 1925-ci ildə Təbrizdə anadan olan alim Tehran və İstanbul universitetlərinin tibb fakültələrində təhsil alıb, Paris Universitetində cərrah ixtisasına yiyələnib. Ürək üzərində həyata keçirdiyi uğurlu əməliyyatlar ona beynəlxalq şöhrət qazandırıb.
Akademik qeyd edib ki, 1970-ci ildən nəşr olunan “Varlıq” dərgisi Cavad Heyətə humanitar sahənin görkəmli mütəxəssisi və XX əsrdə Azərbaycan xalqının yetişdirdiyi ən böyük ziyalılardan biri kimi nüfuz qazandırıb. Bu jurnal İranda və dünyada yaşayan azərbaycanlıların milli-mənəvi varlığını qoruyan və zənginləşdirən bir nəşr kimi mühüm rol oynayıb.
Cavad Heyətin türkologiya, tibb və digər sahələrdə əvəzedilməz xidmətlər göstərdiyini vurğulayan İsa Həbibbəyli onun Azərbaycan ədəbiyyatı tarixi, türk xalqlarının keçmişi, folklor, islamşünaslıq və dilçilik sahələrində də dəyərli araşdırmalar apardığını diqqətə çatdırıb.
Daha sonra Fəlsəfə və Sosiologiya İnstitutunun direktoru, fəlsəfə elmləri doktoru, professor İlham Məmmədzadə çıxış edərək Cavad Heyətin milli kimlik, türk tarixinin fəlsəfəsi və etnogenez mövzularında apardığı müqayisəli tədqiqatlara toxunub. O, “Varlıq” jurnalının da fəlsəfi düşüncəyə əsaslandığını qeyd edib.
Konfrans çərçivəsində institutun elmi işlər üzrə direktor müavini, tarix elmləri doktoru Eynulla Mədətli “Cavad Heyət və ‘Varlıq’ dərgisi milli varlıq uğrunda mübarizədə” mövzusunda məruzə ilə çıxış edib. O bildirib ki, alimin fədakar fəaliyyəti sayəsində geniş tədqiqatçı və ziyalı çevrəsi ilə formalaşan əməkdaşlıq “Varlıq” jurnalını türk dünyasının milli-mədəni kimliyinin qorunmasında və inkişafında əvəzsiz platformaya çevirib.
Konfransda digər məruzəçilər – tarix üzrə fəlsəfə doktoru Səməd Bayramzadə, filologiya elmləri doktoru Pərvanə Məmmədli, fəlsəfə üzrə fəlsəfə doktoru, dosent Nəzakət İsmayılova, tarix üzrə fəlsəfə doktoru, dosent Əli Fərhadov, elmi işçi Yasəmən Mahmudova (Qaraqoyunlu), Məhəmməd Rza Heyət, tarix elmləri doktoru Tahirə Həsənzadə və fəlsəfə üzrə fəlsəfə doktoru, dosent Faiq Ələkbərli də Cavad Heyətin elmi və mənəvi irsinə dair çıxışlar ediblər.
Tədbirdə həmçinin keçmiş səfir Cavanşir Axundov, fəlsəfə elmləri doktoru Füzuli Qurbanov, f.ü.f.d., dosent Şölət Zeynalov, tarix üzrə fəlsəfə doktoru, dosent Mübariz Ağalarli və biologiya üzrə fəlsəfə doktoru Sadıq Qarayevin də çıxışları dinlənilib.
Sonda Cavad Heyətin həyat və fəaliyyətinə həsr olunmuş videoçarx nümayiş etdirilib.
Aydan Quliyeva
20:04 25.04.2025
Oxunuş sayı: 4738
