Qəzza probleminin həllinin başlaması üçün şərt açıqlandı - RƏY
Qəzza zolağının cənubundakı Rəfahdə atəşkəs rejiminin pozulmasının arxasında Fələstinin HƏMAS radikal hərəkatının üsyançıları dayanır.
Bu barədə ABŞ Prezidenti Donald Tramp bildirib. O, radikalların rəhbərliyinin hadisə ilə əlaqəsinin olmadığını güman edib.
Yaxın Şərqdə atəşkəsin pozulması və Trampın səsləndirdiyi fikirlər barədə Crossmedia.az-a danışan siyasi şərhçi Elçin Alıoğlu bildirib ki, HƏMAS üsyançı təşkilat deyil:
“O, hazırda Fələstini təmsil edən, fələstinlə bağlı məsələlərdə özünü səlahiyyətli göstərən bir qurumdur. Qəzzada legitim və ya qeyri-legitim olmasından asılı olmayaraq, HƏMAS orada yeganə real gücə malik təşkilatdır.
Rəfah məntəqəsinə gəlincə, ABŞ HƏMAS-ın problemlərindən bəhs etməzdən əvvəl, bölgədəki real humanitar məsələlərin həllinə yönəlməlidir. Hazırda Rəfah qapısı vasitəsilə sutkada cəmi 560 ton ərzaq məntəqəyə daşınır. İsrail isə yardımların Rəfahdan deyil, Qəzzanın şimalındakı “Kəram Şalom” məntəqəsindən buraxılmasını istəyir”.
E.Alıoğlunun sözlərinə görə, ABŞ-nin Qəzzaya yerləşdirməyə çalışdığı və tərkibində Azərbaycanın da yer alacağı ehtimal edilən beynəlxalq missiyaya gəlincə, bu missiyanın fəaliyyətə başlamasından əvvəl əsas məsələ onun fəaliyyəti üçün zəminin yaradılmasıdır:
“Qəzzanın problemlərinin həllinə başlamazdan öncə, oradakı situasiyaya siyasi və administrativ yollarla real dəstək və töhfələr verilməlidir. HƏMAS-ın mozaik şəbəkəsinə son qoymaq və antiterror hücumlarının qarşısını almaq üçün məqsədəuyğun olardı ki, Qəzzada hərbi konfiqurasiya siyasi konfiqurasiyaya çevrilsin. Ümumiyyətlə, burada əsas məsələ Qəzzanın kim tərəfindən idarə olunmasıdır. Düşünürəm ki, yaxın üç ay ərzində İsrailin epizodik zərbələrinin artmasının və çox kövrək, tez pozulan bir atəşkəsin şahidi olacağıq. Yaxın illərdə Fələstin məsələsinin həlli istiqamətində müəyyən addımlar atılsa da, mən hələlik bu problemin tam həllini görmürəm”.
Müsahibimiz bildirib ki, bu məsələnin yeganə həlli iki dövlətin — Fələstin və İsrailin yaranmasıdır:
“ Lakin İsrail Fələstin dövlətinin formalaşmasına qarşı çıxır. ABŞ-nin yeni təkliflər paketi nədən ibarət olacaq bu mənim üçün çox maraqlıdır. Burada Kuşnerin vasitəçiliyi ilə, Qətərin, Misirin, Türkiyənin və s. vasitəçiliyi ilə aparılan danışıqlar var. Bu iki tərəf nə vaxt birləşərsə, o zaman Qəzza probleminin həllinin başlamasından danışa bilərik”.
Türkanə Məşədiyeva
13:45 20.10.2025
Oxunuş sayı: 1120
