İsrailin Qəzzaya hücumları davam edir: 6 fələstinli həlak olub
İsrail ordusunun Qəzza zolağında müxtəlif nöqtələrə həyata keçirdiyi hava və quru hücumları nəticəsində azı 6 fələstinli həyatını itirib, 8 nəfərdən çox insan yaralanıb.
Crossmedia.az bu barədə Fələstin mediasına istinadən xəbər verir.
Şahidlərin sözlərinə görə, İsrail qüvvələri Qəzza şəhərində minlərlə mülki şəxsin sığındığı Yarmuk stadionunun ərazisində yerləşən çadırları hədəf alıb. Hücum nəticəsində 3 nəfər ölüb, 7 nəfər yaralanıb.
Qəzza şəhərinin qərbində qaçqınların yaşadığı başqa bir çadıra pilotsuz uçuş aparatı ilə edilən zərbə nəticəsində bir fələstinli həlak olub, bir nəfər isə xəsarət alıb. Bundan əlavə, bölgənin mərkəzində yerləşən bir mənzilə təşkil edilən hücumda iki fələstinli həyatını itirib.
Dünən səhər saatlarından başlayaraq Qəzza zolağında məcburi köçkünlərin yaşadığı ərazilərə təşkil edilən hücumlar nəticəsində ümumilikdə 13 fələstinlinin öldüyü bildirilib.
Qeyd edək ki, 19 yanvarda qüvvəyə minmiş atəşkəsi pozan İsrail ordusu 18 mart tarixində Qəzzaya qarşı genişmiqyaslı hücumlarını bərpa edib.
Hücumların bərpasından bu yana, əksəriyyəti qadın, uşaq və yaşlılardan ibarət olmaqla 1 630 fələstinli həlak olub, 4 302 nəfər isə yaralanıb.
Xatırladaq ki, İsrailin 7 oktyabr 2023-cü ildən bəri Qəzza zolağına qarşı həyata keçirdiyi hərbi əməliyyatlar nəticəsində ölənlərin ümumi sayı 51 minə, yaralananların sayı isə 116 343 nəfərə çatıb.
İsrail tərəfi yeni atəşkəs təkliflərini rədd etdiyini açıqlayaraq, HƏMAS-a qarşı “artan hərbi güclə” hərəkət edəcəyini bildirib. HƏMAS isə İsraili verdiyi vədlərə əməl etməməkdə və vasitəçi ölkələr qarşısında öhdəliklərini yerinə yetirməməkdə ittiham edib. Hərəkatın bəyanatında İsrailin Qəzzada fələstinlilərə qarşı soyqırımı siyasətini yenidən başladığı qeyd olunub.
Hücumların, İsrailin baş naziri Benyamin Netanyahunun daxili kəşfiyyat orqanı Şin-Betin direktorunu vəzifədən azad etməsi kimi siyasi gərginliklərin fonunda baş verməsi diqqət çəkir.
Aybəniz Səfərova
23:12 16.04.2025
Oxunuş sayı: 1921
