Azərbaycan Şimali Kipr Türk Cümhuriyyətini tanıya bilər - AÇIQLAMA
Aprelin 9-da ADA Universitetində Azərbaycan Prezidenti İlham Əliyevin iştirakı ilə “Yeni dünya nizamına doğru” mövzusunda beynəlxalq forum keçirilib. Forumda dünya siyasətindəki mövcud dəyişikliklər və Azərbaycanın beynəlxalq aləmdəki müstəqil mövqeyi müzakirə edilib. Prezident İlham Əliyev Azərbaycanın Qərb ölkələri ilə əlaqələrini davamlı olaraq inkişaf etdirdiyini və hər zaman müstəqil siyasətini qoruyacağını vurğulayıb. Forumun əsas mövzusu, dünya nizamının dəyişməsi və Azərbaycanın bu dəyişikliklərə necə yanaşdığına dair olub.
Prezident ölkəmizin Şimali Kipr Türk Respublikası ilə bağlı dəyişməz mövqeyini də bəyan edib: “Azərbaycan Şimali Kipr Türk Respublikasının Türk Dövlətləri Təşkilatında müşahidəçi statusu almasında fəal rol oynadı. Biz bu məsələni fəal şəkildə müdafiə edən ölkələrdənik. Biz hər zaman qardaşlarımızın yanındayıq. Bizim siyasətimiz hər zaman aydın olub. Bizim bu sahədə hər hansı başqa gündəliyimiz yoxdur. Biz yalnız qardaşlarımıza necə kömək edə biləcəyimiz haqda düşünürük ki, onlar öz dövlətlərini qoruyub saxlaya bilsinlər. Onlar buna tarix və əməlləri baxımından layiqdirlər”.
Mövzu ilə bağlı Crossmedia.az-a açıqlama verən politoloq Arzuman Abdulkərimov Azərbaycanın bu prinsipial mövqeyini yüksək qiymətləndirdiyini bildirib. Abdulkərimov, Prezident İlham Əliyevin verdiyi mesajların təkcə ölkənin diplomatik siyasətini gücləndirmədiyini, eyni zamanda türk xalqları arasında birliyin qorunmasına xidmət etdiyini bildirib. O, Azərbaycanın bu mövqeyinin, türk dövlətlərinin gələcək birliyini dəstəkləyən bir addım olduğunu qeyd edib.
Politoloq, Azərbaycan Prezidentinin bu mövqeyini qürurverici olaraq qiymətləndirib və bunun daha çox Azərbaycanda yaşayan türk xalqlarının, ümumilikdə türk dövlətlərinin birliyini istəyənlər üçün önəmli olduğunu vurğulayıb. Həmçinin, o, digər üç türk respublikasının, Şimali Kipr məsələsində tutduğu mövqeyi təəssüflə qarşılayıb. Onun fikrincə, bu dövlətlərin belə bir mövqe tutması tələskən bir addımdır və bu məsələyə diqqətlə yanaşılmasının vacib olduğunu bildirib.
Abdulkərimov, həmin dövlətlərin Şimali Kipr məsələsində yeni bir strateji yanaşma izləyərək, Yunan Kiprində öz nümayəndəliklərini açmaqla, gələcəkdə Quzey Kıbrıs Türk Cumhuriyyətinin müstəqilliyini tanımaq məqsədini güdə biləcəklərini də bildirib. Bununla belə, ekspert, bu addımın real olacağı təqdirdə, mövqenin daha balanslı olacağını qeyd edib. Lakin o, bu mövqenin gerçəkləşməsə belə, həmin dövlətlərdən Quzey Kıbrıs Türk Cumhuriyyəti ilə bağlı prinsipial mövqe gözlədiyini ifadə edib.
"Gələcəkdə türk dövlətlərinin zirvə toplantısında Şimali Kipr məsələsinin daha geniş şəkildə müzakirə ediləcəyinə ümid edirəm" - deyə politoloq bildirib. Həmin toplantılarda türk dövlətlərinin nümayəndələrinin bir araya gələcəyini və bu məsələnin daha ətraflı müzakirə ediləcəyini qeyd edib. O, həmçinin, Quzey Kıbrıs Türk Cumhuriyyəti ilə bağlı gözləntilərin artırılmasını və bu dövlətin türk dövlətlərinin zirvə toplantılarında iştirak etməsinin vacibliyini vurğulayıb.
Arzuman Abdulkərimov, Azərbaycan Prezidentinin göstərdiyi prinsipial mövqeyin, gələcəkdə Quzey Kıbrıs Türk Cumhuriyyətinin müstəqilliyini tanıyacaq növbəti ölkə olacağını düşündüyünü qeyd edib. O, Azərbaycanın bu məsələdə irəliləyərək, Şimali Kipr ilə birbaşa diplomatik əlaqələr quracağını və qarşılıqlı nümayəndəliklərin açılacağını da gözlədiyini, nəqliyyat xətləri və hava nəqliyyatının açılması kimi məsələlərin də öz həllini tapacağına inandığını qeyd edib.
Son olaraq, Abdulkərimov, Azərbaycanın bu mövqeyini yüksək qiymətləndirərək, Prezident İlham Əliyevin qətiyyətli və prinsipial siyasətini dəstəklədiyini bildirib. O, Azərbaycanın Şimali Kipr Türk Cümhuriyyəti ilə əlaqələrinin gücləndirilməsini və bu sahədə daha da irəliləməsini ümid etdiyini qeyd edib.
Zəhra Ağayeva
19:44 09.04.2025
Oxunuş sayı: 24558
