Ankarada türk dövlətlərinin tarixi üzrə işçi iclas keçirilib
Ankarada türk dövlətlərinin tarixi üzrə ümumi akademik işin konsepsiyasını müzakirə etmək üçün Türk Dövlətləri Təşkilatına üzv və müşahidəçi ölkələrin tarix və arxeologiya institutlarının rəhbərlərini, eləcə də aparıcı tarixçiləri və ekspertləri bir araya gətirən beynəlxalq işçi iclası keçirilib.
Türk Akademiyasının mətbuat xidməti xəbər verir ki, türk xalqlarının vahid tarixinin yaradılması ideyası 2024-cü il noyabrın 6-da Bişkekdə keçirilmiş Türk Dövlətləri Təşkilatının XI sammitində irəli sürülüb. Dövlət rəhbərlərinin göstərişi ilə layihənin koordinasiyasını Türk Akademiyası həyata keçirir.
Türk Tarix Qurumunun binasında keçirilmiş iclasda Türk Akademiyasının prezidenti Şahin Mustafayev, Türk Dövlətləri Təşkilatının Ağsaqqallar Şurasının sədri Binəli Yıldırım, Atatürk adına Mədəniyyət, Dil və Tarix üzrə Ali Şuranın prezidenti Dərya Ors və Türkiyə Tarix Qurumunun prezidenti Yüksel Özgen iştirak ediblər.
İclası açıq elan edən Ş.Mustafayev layihəyə fəal dəstək verən bütün iştirakçılara təşəkkür edib və birgə fəaliyyətin vacibliyini vurğulayıb.
“Hətta bir ölkənin belə tarixi üzrə icmal işin ərsəyə gətirilməsi asan deyil. Bizim missiya olan qohum xalqlar və dövlətlər qrupunun inteqrasiya olunmuş tarixini yazmaq daha da çətindir”, - deyə Ş.Mustafayev qeyd edib.
O, çıxışında ilk addım olaraq, iştirakçıların gələcək kollektiv monoqrafiyanın konseptual əsaslarını müəyyən etməli olduqlarını vurğulayıb. Qeyd edib ki, əsər həm akademik dərinliyə, həm də sadə üsluba malik olmalıdır. İşin yalnız ciddi elmi xarakter daşımaması, eyni zamanda tələbələr və gənc tədqiqatçılar da daxil olmaqla geniş auditoriya üçün anlaşıqlı olması vacibdir.
Kollektiv monoqrafiyanın əsas məqsədi Türk dünyasının tarixinin əsas mərhələlərini işıqlandırmaq, qardaş xalqların ümumi tarixi şüurunun formalaşdırılması, xüsusən də gənclər arasında milli qürurun möhkəmləndirilməsi, həmçinin beynəlxalq arenada türk tarixi və mədəni irsinin tanıdılmasıdır.
İclasın sonunda Türk Akademiyasının başçısı, tarix və arxeologiya institutlarının rəhbərləri türk dövlətlərinin tarixi üzrə akademik işin ortaya qoyulması üçün əməkdaşlıq haqqında protokolu imzalayıblar.
07:19 25.02.2025
Oxunuş sayı: 4284
