Çörəyin içindən siqaret kötüyü çıxdı: "Hadisə nəzarətə götürülüb" - RƏSMİ AÇIQLAMA
Bakıda mağazaların birindən alınan zavod istehsalı çörəyin içindən siqaret kötüyü çıxıb. İstehlakçının aşkarladığı və ictimailəşdirdiyi hadisə sosial mediada geniş müzakirə olunmaqdadır.
Məsələ ilə bağlı çörəyi istehsal edən müəssisə hələ rəsmi açıqlama verməsə də, qida mütəxəssisləri istehsalat prosesində ciddi gigiyena və keyfiyyət nəzarəti problemlərinin ola biləcəyini bildirirlər.
Məsələ ilə bağlı Azərbaycan Qida Təhlükəsizliyi Agentliyinin (AQTA) mətbuat katibi İlkin Kərimov Crossmedia.az-a açıqlamasında bildirib ki, agentliyin regional bölməsi hadisəni nəzarətə götürülüb:
“Agentliyin mütəxəssisləri faktla bağlı müvafiq araşdırmalara başlayıblar. Araşdırmanın nəticəsi ilə bağlı əlavə məlumat veriləcək”.
Qida eksperti Ağa Salamov isə bildirib ki, belə hadisələr əsasən istehsalat sahələrində gigiyena qaydalarına düzgün əməl olunmaması və işçilərin səhlənkarlığı səbəbindən baş verir:
“Çox zaman istehsal sahələrində siqaret çəkən işçilər olur və bu, müəssisə daxilində qəti şəkildə qadağan edilməlidir. Əks halda, bu kimi hadisələrin baş verməsi qaçılmazdır. Bununla yanaşı, fiziki çirklənmə müxtəlif səbəblərdən yarana bilər. Məsələn, istehsal prosesində ehtiyatsızlıq nəticəsində məhsulun içinə yad cisimlər – torpaq, şüşə qırıntıları, metal hissəcikləri, siqaret kötüyü, həşəratlar (milçək, tarakan və s.) düşə bilər. Bu da dezinfeksiya və təmizləmə işlərinin düzgün aparılmamasından qaynaqlanır”.
Ekspertin sözlərinə görə, bu ilk belə hal deyil və oxşar hadisələrə daha əvvəl də rast gəlinib:
“Daha əvvəl də zavod çörəklərinin içindən həşəratlar, şüşə və metal hissəcikləri tapılıb. Hətta bəzən çörəyin alt hissəsində qara ləkələrin olması müşahidə edilir ki, bu da istehsalat avadanlıqlarının vaxtında təmizlənməməsindən və kimyəvi çirklənmədən xəbər verir”.
Problemin həlli üçün ekspert istehsalat müəssisələrində işçilərin tibbi müayinədən keçməsinin və mütəmadi gigiyena təlimlərinin keçirilməsinin vacib olduğunu vurğulayıb:
“Sanitar-gigiyena normalarına əməl olunmalı, işçilər üçün xüsusi uniforma təmin edilməli və iş prosesində qaydalara ciddi nəzarət edilməlidir. Bir çox halda müəssisələrdə siqaret çəkilmədiyini iddia edirlər, lakin əslində buna nəzarət yetərli səviyyədə olmur. Qida istehsalı sahələrində siqaret çəkmək qəti qadağan edilməli və bu qaydanın pozulması ciddi məsuliyyətə cəlb olunmalıdır”.
Bu hadisə bir daha göstərir ki, qida təhlükəsizliyi məsələlərinə daha ciddi nəzarət edilməli, istehsal müəssisələrində sanitar-gigiyena qaydalarına riayət olunması üçün əlavə tədbirlər görülməlidir. İstehlakçılar isə belə hallarla qarşılaşdıqları halda aidiyyəti qurumlara rəsmi şikayət etməlidirlər.
Maral Şahverdili
16:40 10.02.2025
Oxunuş sayı: 5355
