Sürücülər üçün görünməz tələ: Köhnə xətlər yeniləri ilə qarışıb
Yol hərəkətinin təhlükəsiz və nizamlı təşkili üçün yol nişanları və
nişanlanma xətlərinin düzgün tətbiqi mühüm əhəmiyyət daşıyır. Sürücülər hərəkət
zamanı bu nişanlanmalara əsaslanaraq zolaq seçir, istiqamət müəyyənləşdirir və
manevrlərini həyata keçirirlər. Lakin paytaxtın bəzi küçə və prospektlərində
yol xətlərinin qarışıq, silinmiş və ya əvvəlki nişanlanmaların izləri ilə
birlikdə qalması sürücülər üçün çaşqınlıq yaradır. Belə hallar təkcə hərəkətin
rahatlığına deyil, həm də yol-nəqliyyat hadisələrinin başvermə riskinə təsir
göstərə bilər.
Bakının Vaqif prospektində yol nişanlanması ilə bağlı sürücülərin narazılığı da bu problemi yenidən gündəmə gətirib. Sürücülərdən birinin sosial şəbəkədə paylaşdığı görüntülərdə bəzi zolaqların və silinmiş yol xətlərinin hərəkət iştirakçılarını çaşdırdığı bildirilir. Paytaxtın digər küçələrində də rast gəlinən bu cür vəziyyətlər yol nişanlanmalarının hansı standartlara uyğun çəkilməsi və sürücülərin onları necə anlamalı olduğu məsələsini aktuallaşdırır.

Nəqliyyat eksperti Aslan Əsədov bildirib ki, belə hallar xoşagəlməzdir:
“Bu zaman vətəndaşlar aidiyyəti qurumlara müraciət etməli, yaranmış
problemin aradan qaldırılmasını tələb etməlidirlər. Müvafiq qurumlar isə
məsələyə planlı şəkildə yanaşmalı, cari və əsaslı təmir işlərini müəyyən
edilmiş müddətlər çərçivəsində həyata keçirməlidirlər. Bunun üçün xüsusi
proqram hazırlanmalı, zəruri işlər mərhələli şəkildə icra olunmalı və problemin
həlli sistemli formada təmin edilməlidir.
Nəqliyyat axınlarının səmərəli idarə olunmasında əsas amillərdən biri də
mövcud qaydaların düzgün tətbiqidir. Əgər nəqliyyat sistemində hərəkətin
təşkili və axınların idarə olunması baxımından səmərəliliyi qoruyub saxlaya
biliriksə, bu, mühüm nailiyyətdir. Lakin mövcud xətlərin üst-üstə düşməsi və
infrastruktur problemləri iş prosesinin ləngiməsinə səbəb olur. Bu isə
sərnişindaşıma, yükdaşıma və ümumilikdə turizm sektoruna mənfi təsir göstərir,
nəqliyyat sisteminin normal fəaliyyətini çətinləşdirir.
Ona görə də mövcud problemlərin aradan qaldırılması üçün xüsusi
metodologiyanın hazırlanması və tətbiqi vacibdir. Bu metodologiya çərçivəsində
problemlər müəyyənləşdirilməli, prioritet istiqamətlər seçilməli və onların
həlli üzrə ardıcıl tədbirlər həyata keçirilməlidir”.
Məhəbbət Tərlanoğlu
15:30 17.11.2026
Oxunuş sayı: 367