Müəllimlərin geyimi ilə bağlı yeni qaydalar AÇIQLANDI
Müəllimlərin geyim tərzinə dair tələblərin müəyyənləşdirilməsi məsələsi qanunvericilikdə edilən dəyişikliklərlə yenidən gündəmə gəlib. 2026-cı ilin iyulunda qəbul edilən qanun dəyişikliyinə əsasən, dövlət ümumi təhsil müəssisələrində təhsilverənlərin geyiminə dair tələblərin müəyyən edilməsi üçün hüquqi əsas yaradılıb. Bu dəyişiklik müəllimlərin peşəkar statusuna və təhsil mühitinin xüsusiyyətlərinə uyğun geyim standartlarının tətbiqini nəzərdə tutur.
Müəllim geyiminə dair tələblərin illər əvvəl qəbul edilmiş etik davranış qaydalarında da əks olunması göstərir ki, məsələ yalnız fərdi seçim deyil, həm də təhsil işçisinin peşəkar davranış və görünüşü ilə bağlı yanaşmanın bir hissəsi kimi qiymətləndirilir.
Crossmedia.az-a açıqlamasında təhsil eksperti Elçin Əfəndi ümumi təhsil müəssisələrində təhsilverənlərin vahid geyim formasına dair tələblərdən danışıb. O bildirib ki, Nazirlər Kabinetinin 6 oktyabr 2026-cı il tarixli 305 nömrəli qərarında müəllimlərin geyim üslubu ilə bağlı müvafiq tələblər müəyyənləşdirilib:
“Qərarda qeyd olunduğu kimi, təhsilverənlər, həm kişi, həm də qadınlar, müvafiq tələblərə riayət etməlidirlər. Hər iki cinsin nümayəndələri sərbəst kəsimli, klassik üslublu dəstlərdən istifadə edə bilərlər. Məsələn, kişilər pencək və şalvar, qadınlar isə pencək və ətək, yaxud pencək və don geyinə bilərlər. Xanımlar ətək geyinərkən diz xəttində və ya dizdən aşağı olan ətəklərə üstünlük verməlidirlər. Klassik ayaqqabıdan da istifadə oluna bilər”, - deyə ekspert qeyd edib".
Elçin Əfəndi milli tədbirlər zamanı geyimdə milli elementlərdən istifadənin mümkün olduğunu bildirib: “Amma ümumi tədris prosesində Nazirlər Kabinetinin müəyyən etdiyi qaydalar əsasında geyim tələblərinə riayət olunmalıdır. Burada hansısa cərəyanı və ya dini özündə əks etdirən elementlər geyimdə əks olunmamalıdır. Konkret vahid geyim formatı müəyyən edilibsə, həmin formata riayət olunmalıdır”.
Ekspert təhsilverənlərin əmək funksiyalarını yerinə yetirdikləri müddətdə məktəbin işgüzar mühitinə və pedaqoji fəaliyyətin xarakterinə uyğun geyinməli olduqlarını vurğulayıb: “Təhsilverənin əmək funksiyalarını yerinə yetirdiyi müddətdə məktəbin işgüzar mühitinə, pedaqoji fəaliyyətin xarakterinə və təhsilalanların yaş xüsusiyyətlərinə uyğun olmayan, həmçinin mövcud tələblərdə müəyyən edilmiş geyim üslubundan kənara çıxmağa yol verilmir. Bu, həmin qərarın 2.4-cü bəndində də öz əksini tapıb”.
Elçin Əfəndinin sözlərinə görə, vahid geyim tələbi müəllimlərin fərdi seçimini tamamilə məhdudlaşdırmır: “Müəllimlərə konkret olaraq bildirilir ki, belə geyimlərdən istifadə edin. Kimsə hansısa rəngdə geyinəcək, kimsə qara, kimsə çəhrayı rəngdə geyinəcək və s. Bu artıq müəllimin öz seçimidir. Amma müəllimə deyə bilmərik ki, siz qısa ətəklə və yaxud gündəlik geyiminizlə təhsil müəssisəsinə gəlin. Burada həm təhsil müəssisəsinin, həm də müəllimin imici zədələnmiş olur”.
O hesab edir ki, vahid geyim formatı müəllimin cəmiyyətdə daha aydın tanınmasına və peşəkar imicinin formalaşmasına da təsir göstərir: “Vahid geyim formatı həmin müəllimi cəmiyyətə tanıdır ki, bu şəxs müəllimdir. Beləcə, müəllim nüfuzunun da yüksəlməsinə xidmət edir”.
Nigar Xəlilli
17:15 07.10.2026
Oxunuş sayı: 51
