Kiyevə gecə hücumu: Rusiya 70 raket və çoxsaylı PUA ilə zərbə endirdi
Rusiya ordusu Ukraynaya gecə və səhər saatlarında genişmiqyaslı hava hücumu həyata keçirib.
Crossmedia.az xəbər verir ki, Kiyev meri Vitali Kliçkonun sözlərinə görə, paytaxtın müxtəlif rayonlarında infrastruktur obyektlərinə ziyan dəyib, ilkin məlumata əsasən, 2 nəfər həyatını itirib. Hücumlar zamanı təhlükəsizlik məqsədilə çox sayda sakin gecəni Kiyevin metro stansiyalarında keçirib.
Poltava vilayətinin Kremençuk şəhərinə endirilən zərbələr nəticəsində isə 2 nəfər ölüb, 7 nəfər yaralanıb.
Çerniqov vilayətinin Priluki şəhərinə raket zərbəsi nəticəsində ilkin məlumatlara görə 4 nəfər ölüb, 20 nəfər yaralanıb. Ukrayna Prezidenti Volodimir Zelenski daha sonra Prilukidə yaşayış binasının vurulduğunu, ölənlərin sayının 5-ə, yaralananların sayının isə 26-ya çatdığını bildirib.
Ukrayna Hərbi Hava Qüvvələrinin məlumatına görə, hücum zamanı müxtəlif tipli raketlər və pilotsuz uçuş aparatlarından istifadə olunub. Ukrayna hava hücumundan müdafiə qüvvələri 44 raket və 117 PUA-nı zərərsizləşdirib.
Zelenski bildirib ki, Rusiya qüvvələri əsasən enerji infrastrukturlarını hədəfə alıb və Kiyev də daxil olmaqla 12 vilayətin infrastrukturu hücuma məruz qalıb. Onun sözlərinə görə, hücumda ümumilikdə 70 raket və çoxsaylı PUA istifadə edilib.
Ukrayna Prezidenti həmçinin Rusiyanın Perm, Samara və Həştərxan vilayətlərindəki iki neft obyektinə və bir poliqona zərbələr endirildiyini açıqlayıb. Onun sözlərinə görə, Ukrayna qüvvələri Qara dənizdə də bir hədəfə qarşı cavab əməliyyatı həyata keçirib.
13:12 07.10.2026
Oxunuş sayı: 58
