İran rəsmisi: ABŞ İnsan Hüquqları Şurasından çıxmaqla məsuliyyətdən yaxa qurtara bilməz
İran xarici işlər nazirinin müavini Kazım Qəribabadi ABŞ-nin BMT-nin İnsan Hüquqları Şurasından çıxmaqla İranın Minab və Lamerd şəhərlərində mülki şəxslərə qarşı həyata keçirilən hücumlara görə məsuliyyətdən yayına bilməyəcəyini bildirib.
Crossmedia.az xəbər verir ki, Qəribabadi ABŞ-nin BMT İnsan Hüquqları Şurasından çıxması ilə bağlı sosial şəbəkədə paylaşım edib.
İran rəsmisi ABŞ-nin Minab şəhərində məktəbə, Lamerd şəhərində isə idman zalına endirdiyi zərbələrin tarix tərəfindən unudulmayacağını vurğulayıb.
“Minabda bir məktəb 168 uşağın qanı ilə boyandı, Lamerdə isə idman zalı mülki şəxslərin qətlə yetirildiyi məkana çevrildi”, – Qəribabadi qeyd edib.
O bildirib ki, artıq Minab və Lamerdə baş verənlərin “əməliyyat səhvi deyil, açıq şəkildə müharibə cinayəti” olduğunu təsdiqləyən mövqelər mövcuddur.
“Amerika İnsan Hüquqları Şurasından çıxmaqla məsuliyyətdən yaxa qurtara bilməz”, – İran xarici işlər nazirinin müavini vurğulayıb.
BMT hesabatında ABŞ ilə bağlı müharibə cinayəti iddiası
BMT-nin İran üzrə Beynəlxalq Müstəqil Araşdırma Komissiyası ABŞ-nin İran ərazisində ayrı-seçkilik qoymadan həyata keçirdiyi hücumlar nəticəsində mülki şəxslərin öldürülməsi, yaralanması və mülki obyektlərə ziyan dəyməsi ilə bağlı ABŞ-nin müharibə cinayəti törətmiş ola biləcəyinə dair əsaslı şübhələrin olduğunu bildirib.
Hesabatda Minab və Lamerdəki hücumlara da toxunulub. Sənəddə ABŞ və İsrailin fevralın 28-də İrana qarşı başladığı hücumlardan sonra həyata keçirilən iki hava zərbəsi nəticəsində qadın və uşaqlar da daxil olmaqla ən azı 178 mülki şəxsin öldüyü qeyd edilib.
Komissiya bu hücumlarla bağlı ABŞ-nin müharibə cinayəti törətmiş ola biləcəyinə inanmaq üçün əsaslı dəlillərin olduğunu bildirib.
ABŞ İnsan Hüquqları Şurasından çıxıb
ABŞ Prezidenti Donald Trampın 2025-ci ilin fevralında imzaladığı fərmanla ABŞ BMT İnsan Hüquqları Şurasından çıxıb.
Tramp Şura da daxil olmaqla BMT-nin bir sıra qurum və strukturlarının ABŞ-nin maraqlarına zidd fəaliyyət göstərdiyini bildirib.
Minab və Lamerdəki hücumlar
ABŞ və İsrailin fevralın 28-də İrana qarşı başladığı hücumların ilk saatlarında Hörmüzgan əyalətinin Minab şəhərində qızlar üçün məktəbə zərbə endirilib.
Hücum nəticəsində əksəriyyəti uşaqlar olmaqla 168 nəfərin öldüyü bildirilib. Sonrakı məlumatlarda məktəbin ABŞ tərəfindən vurulduğu və obyektə təxminən 40 dəqiqə intervalla iki dəfə zərbə endirildiyi qeyd olunub.
Həmin gün ABŞ ordusunun Fars əyalətinin Lamerd şəhərində idman zalını da hədəfə aldığı və nəticədə 21 mülki şəxsin həyatını itirdiyi açıqlanıb.
16:57 18.09.2026
Oxunuş sayı: 59
