Azərbaycan Basketbol Federasiyasında Məşqçilər Departamenti yaradılıb
Azərbaycan Basketbol Federasiyasında (ABF) ölkədə məşqçilərin peşəkar inkişafına və oyunçuların uzunmüddətli hazırlığına dəstək göstərmək məqsədilə Məşqçilər Departamenti yaradılıb.
Bu barədə Crossmedia.az'a ABF-nın mətbuat xidmətindən məlumat verilib.
Departamentin əsas fəaliyyət istiqamətlərinə məşqçi təhsili, oyunçuların inkişafı, aşağı yaş qrupları üzrə milli komandaların proqramlarının hazırlanması və əlaqələndirilməsi, həmçinin Bakı və Azərbaycanın digər bölgələrində fəaliyyət göstərən ABF akademiyalarında tədris-məşq prosesinin təkmilləşdirilməsi daxildir.
Departament həmçinin milli komandaların məşqçi heyətlərinə texniki dəstək göstərəcək, azərbaycanlı basketbol məşqçilərinin peşəkar inkişafına yönəlmiş təhsil proqramları hazırlayacaq, Azərbaycan Basketbol Liqası və ABF-nin digər yarışlarının texniki səviyyəsinin yüksəldilməsi ilə bağlı təklif və tövsiyələr verəcək.
Tahir Baxşıyev Məşqçilər Departamentinin direktoru təyin olunub. Anar Sarıyev, Zaur Paşayev və Polad Həsənov isə departamentin üzvləri kimi fəaliyyət göstərəcəklər.
16:59 09.09.2026
Oxunuş sayı: 34
