Xarici xəbərlər

ABŞ ordusundan kartellərə qarşı PUA əməliyyatı

ABŞ hərbçiləri avqust ayında ölkənin cənub sərhədində narkokartellərə məxsus olduğu ehtimal edilən 100-ə yaxın pilotsuz uçuş aparatını (PUA) vurub.

Crossmedia.az xəbər verir ki, “Fox News” bu barədə ABŞ Müdafiə Nazirliyinin yüksəkvəzifəli nümayəndəsinə istinadən məlumat yayıb.

Pentaqonun sözçüsü Kingsli Uilson bildirib ki, ABŞ kartellərlə əlaqəli təhdidlərdən hərbçiləri və sərhəd əməliyyatlarını qorumaq üçün müdafiə xarakterli anti-PUA texnologiyalarından istifadə edir.

Məlumata görə, “Cənub sərhədi” əməliyyat qrupu PUA-ların qarşısının alınması üçün xüsusi avadanlıqlardan, o cümlədən mürəkkəb lazer sistemlərindən istifadə edib.

Nümayəndənin sözlərinə görə, bütün əməliyyatlar sərhədin hər iki tərəfində qüvvələr arasında mümkün yanlış qarşıdurmaların qarşısını almaq məqsədilə Meksika hərbçiləri və sərhəd rəsmiləri ilə koordinasiya olunaraq planlaşdırılıb.

Xəbərdə həmçinin Meksikada “Los Reyes” cinayət qruplaşmasının ehtimal olunan lideri Alfonso Fernandes Maqalyonun saxlanıldığı qeyd olunur. O, “Ponço” ləqəbi ilə tanınır.

Meksikanın təhlükəsizlik naziri Omar Qarsiya Arfuşun sözlərinə görə, əməliyyatı hərbçilər və hüquq-mühafizə orqanlarının əməkdaşları həyata keçirib. ABŞ hakimiyyəti onun yeri barədə məlumat verənlər üçün daha əvvəl 5 milyon dollara qədər mükafat elan etmişdi.

Nazirin bildirdiyinə görə, saxlanılmadan sonra qruplaşmanın üzvləri şübhəlinin aparılmasına mane olmağa çalışıb, bir neçə yolu bağlayıb və avtomobilləri yandırıblar.

“Milenio” qəzetinin məlumatına görə, Ponço narkotik alveri, avtomobil oğurluğu və hədə-qorxu ilə pul tələb etməkdə şübhəli bilinir. Qəzet həmçinin “Los Reyes” kartelinin “Karteles Unidos” kimi tanınan cinayət birliyinin tərkibinə daxil olduğunu yazıb.

Mövzular:

ABŞ Cənub sərhədi Kingsli Uilson pilotsuz uçuş aparatı Omar Qarsiya Karteles Unidos Milenio qəzeti

🖨 Çap et

12:04 04.09.2026

Oxunuş sayı: 50