Pezeşkian: İran və Qətər əməkdaşlığı bərpa edə bilər
İran Prezidenti Məsud Pezeşkian Tehranda Qətərin Baş naziri və xarici işlər naziri Şeyx Məhəmməd bin Əbdürrəhman Al Sani ilə görüşüb.
Crossmedia.az xarici mediaya istinadən xəbər verir.
Görüş zamanı Pezeşkian ABŞ-nin İrana qarşı hücumlarının beynəlxalq hüququn bütün prinsiplərinə zidd olduğunu bildirib. O, İranın müharibə axtarmadığını və axtarmayacağını, lakin təzyiq qarşısında geri çəkilməyəcəyini vurğulayıb.
“İran müharibə axtarmayıb, axtarmır və axtarmayacaq, lakin zorakılığa da boyun əyməyəcək. İranın bütün qanuni hüquqları tanınmalıdır”, – deyə Pezeşkian bildirib.
İran Prezidenti problemlərin müharibə və təhdid yolu ilə deyil, dialoq və diplomatiya vasitəsilə həll edilməli olduğunu qeyd edib. O, ABŞ-nin İran liderini, komandirləri, tələbələri və mülki şəxsləri hədəfə aldığını bildirib.
Pezeşkian bölgədə sülh və təhlükəsizliyin təmin olunmasına çalışan Qətər, Pakistan, Oman və digər ölkələrə təşəkkür edib. O, Qətər Əmiri Şeyx Təmimi İrana dəvət edib və bu səfərin bir sıra qeyri-müəyyənliklərin və anlaşılmazlıqların aradan qaldırılmasına kömək edə biləcəyini deyib.
Qətərin Baş naziri Al Sani isə ölkəsinin regionda sabitliyin bərpasını hədəflədiyini bildirib. Onun sözlərinə görə, müharibənin nəticələrindən bütün region ölkələri zərər çəkir və onların ortaq məsuliyyəti təhlükəsizlik, inkişaf və rifahı təmin etməkdir.
Al Sani Qətərin İran üçün səmimi qardaş olduğunu vurğulayıb və diplomatiya, rasional yanaşma və dialoq yolu ilə regionda sabitlik, təhlükəsizlik və iqtisadi sakitliyin bərpası üçün çalışacaqlarını bildirib.
Qətərin İranla elektrik enerjisi və digər sahələrdə əməkdaşlığı genişləndirməyə hazır olduğu da açıqlanıb. Al Sani həmçinin iranlı pilotlarla bağlı məsələdə Qətərin İrana yardım etməyə hazır olduğunu qeyd edib.
23:25 27.08.2026
Oxunuş sayı: 59
