Çinli süni intellekt şirkəti texnologiya istehsal etmir, amma sərvət qazandırır
Çinin süni intellekt startapı MiniMax ilk illərində rəqiblərindən fərqli strategiya seçərək mətn, səs və videonu eyni modeldə emal edə bilən texnologiyanın hazırlanmasına fokuslanıb. Şirkətin 619 milyon ABŞ dolları həcmində IPO keçirməsi isə onun qurucusu Yan Junjienin sərvətinin kəskin artmasına səbəb olub.
Crossmedia.az xəbər verir ki, “The Wall Street Journal” bu barədə məlumat yayıb.
MiniMax 2022-ci ildə “SenseTime” şirkətinin keçmiş rəhbərlərindən biri olan Yan Junjie tərəfindən yaradılıb. Şirkət ənənəvi mətn əsaslı süni intellekt modellərindən fərqli olaraq multimodal sistemlərin hazırlanmasına üstünlük verib. Bu modellər mətn, audio, görüntü, video və musiqi ilə işləmək imkanına malikdir.
Startapın ilk üç ili əsasən bu daha mürəkkəb texnologiyanın hazırlanmasına sərf olunub. Həmin dövrdə Çində bir çox rəqib şirkət “ChatGPT”yə bənzər yerli modellər yaratmağa çalışırdı.
MiniMax 2026-cı ilin yanvarında Honq-Konq birjasında ilkin kütləvi səhm təklifini həyata keçirərək 4,82 milyard Honq-Konq dolları, yəni təxminən 619 milyon ABŞ dolları vəsait cəlb edib. Şirkət səhmləri 165 Honq-Konq dolları qiymətində yerləşdirib.
IPO şirkətin bazarda sürətli yüksəlişini və Yan Junjienin şəxsi sərvətində ciddi artımı üzə çıxarıb. Lakin sonrakı aylarda MiniMax səhmləri təzyiq altında qalıb. “Forbes”in iyul ayındakı hesablamasına görə, Yan Junjienin sərvəti 12,6 milyard dollarlıq zirvədən 3,3 milyard dollara qədər azalıb.
Bununla belə, MiniMax süni intellekt sahəsində fəaliyyətini davam etdirir. Şirkətin IPO-dan əldə etdiyi vəsaitin böyük hissəsini növbəti beş il ərzində tədqiqat və inkişafa yönəltməsi planlaşdırılır.
15:19 25.08.2026
Oxunuş sayı: 62
