ABŞ bazarları yüksəlişdə: İran sanksiyaları neft və dolları hərəkətə gətirdi
ABŞ fond bazarlarında fyuçerslər yüksəlib, xəzinə istiqrazlarının gəlirlilikləri isə sabit qalıb. Buna ABŞ-nin İrana qarşı yeni iqtisadi təzyiq tədbirləri və ABŞ maliyyə naziri Skott Bessentin sərt xəbərdarlıqları səbəb olub.
Crossmedia.az xəbər verir ki, “The Wall Street Journal” bu barədə məlumat yayıb.
Bessent bildirib ki, İranla biznes əlaqələrini davam etdirən ölkə və şirkətlər ABŞ-nin cavab tədbirləri ilə üzləşə bilər. Bununla belə, o, Çin də daxil olmaqla konkret ölkələrə qarşı hansı addımların atılacağını açıqlamayıb.
Xəbərin yayılmasından sonra neftin qiyməti geriləyib. Avropada səhər ticarəti zamanı “Brent” markalı neftin oktyabr fyuçersləri 0,4 faiz ucuzlaşaraq 91,84 ABŞ dollarına, “WTI” isə 0,5 faiz azalaraq 84,55 ABŞ dollarına düşüb.
ABŞ dolları da möhkəmlənərək bir həftənin ən yüksək səviyyəsinə çatıb. Dollar indeksinin (DXY) 99,106 səviyyəsinə yüksəldiyi bildirilib. Analitiklər bunu İranla əməkdaşlıq edən ölkə və bankların dollar əsaslı maliyyə sistemindən kənarlaşdırılma ehtimalı ilə əlaqələndirirlər.
ABŞ-də əsas fond indekslərinin fyuçersləri də artıb. “Dow Jones” fyuçersləri 0,1 faiz, “S&P 500” 0,2 faiz, “Nasdaq” fyuçersləri isə 0,5 faiz yüksəlib. İnvestorların diqqəti həmçinin “Nvidia”nın çərşənbə günü açıqlanacaq maliyyə nəticələrinə yönəlib.
Asiya bazarlarında isə vəziyyət fərqli olub. Süni intellekt sektorunda yaranan narahatlıqlar fonunda əsas indekslərin əksəriyyəti geriləyib. Cənubi Koreyanın “Kospi” indeksi 0,2 faiz, Honq-Konqun “Hang Seng” indeksi 0,25 faiz, Şanxay Kompozit indeksi 0,1 faiz, Tayvanın “Taiex” indeksi isə 0,2 faiz azalıb.
Avropa bazarlarında isə yüksəliş qeydə alınıb. “Stoxx 600” 0,35 faiz, Londonun “FTSE 100” indeksi 0,1 faiz, Almaniyanın “DAX” indeksi 0,3 faiz artıb. Müdafiə və sənaye şirkətlərinin səhmləri yüksəliş göstərib.
15:13 25.08.2026
Oxunuş sayı: 46
