"Qualcomm" yenidən "MediaTek"i geridə qoydu. Ən yeni "Snapdragon 8 Elite" prosessorlu "OnePlus 13" dünyanın ən güclü smartfonu oldu və "Xiaomi 15"dən daha sürətli performans göstərdi.
Oktyabr sıralamasında ilk iki yerdə "Snapdragon 8 Elite" ilə təchiz edilmiş iki yeni flaqman cihaz var. Yeni nəsil flaqman smartfonlar "AnTuTu" sıralamasında ilk dəfə yer aldı və siyahı demək olar ki, tamamilə yeniləndi. Oktyabrın lideri "OnePlus 13" olub. Maraqlıdır ki, bir vaxtlar "OnePlus 12" bu sıralamanın zirvəsində idi və xeyli müddət birinci sırada qalmışdı. İndi isə "OnePlus 13" öz sələfinin yolunu davam etdirir.
İstehsalçılar "Snapdragon 8 Elite"in "AnTuTu"da 3 milyondan çox bal toplaya biləcəyini iddia etsələr də, "OnePlus 13" və "iQOO 13"ün orta nəticələri bu həddi aşmır. "Snapdragon 8 Elite" prosessorlu "Xiaomi 15" və "Xiaomi 15 Pro" isə gözləntilərdən aşağı nəticə göstərdi.
Hazırda sıralamada dörd "Snapdragon 8 Elite" və beş "Dimensity 9400" modeli var. "Qualcomm"un yeni flaqman çipi ilə təchiz olunmuş ən yüksək mövqedəki model üçüncü yerdəki "Vivo X200 Pro"dur. "Qualcomm" yenidən öz platformasının "MediaTek"dən daha üstün olduğunu sübut etdi.
Emil Bağızadə
