1 həftədə Azərbaycanda 925 yanğın, 10 ölüm: səbəb nədir?
Ötən həftə ərzində ölkə üzrə 925 yanğın hadisəsi qeydə alınıb. Yanğınlar nəticəsində 10 nəfər həyatını itirib və onların meyitləri aidiyyəti üzrə təhvil verilib. Bir həftə ərzində 925 yanğının qeydə alınması ciddi statistikadır və yanğınların əsas səbəbləri ilə bağlı suallar yaradır. Və 1 həftə ərzində 10 nəfərin yanaraq ölməsi ciddi məsələdir.
Mövzu ilə bağlı təhlükəsizlik eksperti Samir Nəbiyev Crossmedia.az-a açıqlamasında bildirib ki, yanğınların əsas səbəbləri arasında quru ot və tullantıların alışması, açıq oddan nəzarətsiz istifadə, söndürülməmiş siqaret və elektrik şəbəkələrinin həddindən artıq yüklənməsi dayanır.
Onun sözlərinə görə, küləkli hava şəraiti də yanğınların daha sürətlə yayılmasına səbəb olur: “Bu həftə ərzində, konkret olaraq bu həftəni nəzərdə tutsaq, rəsmi bölgü açıqlanmasa da, yanğınların yüksək göstəricisi əsasən quru ot və tullantıların alışması, açıq oddan nəzarətsiz istifadə, söndürülməmiş siqaret və elektrik şəbəkələrinin həddindən artıq yüklənməsi ilə əlaqələndirilə bilər. O cümlədən, küləkli hava şəraiti də yanğının daha yüksək sürətlə yayılmasına səbəb olur”.
Ekspert qeyd edib ki, yanğınların yaranmasında əsas səbəb insan amili, yəni antropogen faktordur və bu, əsasən yanğın təhlükəsizliyi qaydalarına əməl olunmaması ilə bağlıdır: “Texniki nasazlıqlar da yanğınların baş verməsində mühüm rol oynayır. Lakin bu nasazlıqların yaranmasına çox vaxt avadanlıqların vaxtında yoxlanılmaması, köhnə naqillərdən istifadə, elektrik şəbəkəsinin həddindən artıq yüklənməsi və avadanlıqların düzgün istismar edilməməsi səbəb olur”.
S.Nəbiyev vurğulayıb ki, hava şəraiti yanğın riskini artırsa da, yanğını başladan əsas amil əksər hallarda insan ehtiyatsızlığı və zəif texniki nəzarətdir: “Hava şəraiti riski artırır, yanğını başladan əsas amil isə əksər hallarda ehtiyatsızlıq və zəif texniki nəzarətdir”.
Zərnigar Hüseynli
12:00 10.08.2026
Oxunuş sayı: 49
