İngiltərədə göldə tapılan təhlükəli tısbağa xilas edildi
İngiltərənin Kambriya qraflığında, Ulverston yaxınlığındakı Ursvik Tarn gölündə “Fluffy” ləqəbli timsah tısbağası (alligator snapping turtle) xilas edilib.
Crossmedia.az xəbər verir ki, BBC bu barədə məlumat yayıb.
Məlumata görə, tısbağanı vaxtilə ABŞ-nin Florida ştatında yaşamış və bu növlə tanış olan Deniz Çemberleyn aşkar edib. O, heyvanın təhlükəli növə aid olduğunu müəyyənləşdirərək xilasetmə əməliyyatını özü həyata keçirib.
Bildirilib ki, ABŞ-də yaşayan bu tısbağalar iti dimdikləri və güclü çənələri ilə tanınır. Onların dişləməsi hətta sümükləri zədələyə biləcək qədər güclü hesab olunur.
Baytar Keyt Hornbi tısbağanı müayinə etdikdən sonra bu növün Böyük Britaniyada olduqca nadir rast gəlindiyini bildirib. Onun sözlərinə görə, “Fluffy”nin vaxtilə ev heyvanı kimi saxlanıldığı, daha sonra isə təbiətə buraxıldığı ehtimal edilir.
Tısbağanın xüsusi ixtisaslaşmış sürünənlər mərkəzinə köçürüləcəyi bildirilir. Mütəxəssislər ekzotik heyvan saxlayan şəxsləri onları almamışdan əvvəl qulluq qaydalarını ətraflı öyrənməyə çağırıblar.
06:34 07.08.2026
Oxunuş sayı: 55
