Almaniyada sui-qəsdin qarşısı alındı - Şübhəlilər aylarla şirkət rəhbərini izləyib
Rusiyanın xüsusi xidmət orqanlarının pilotsuz uçuş aparatları istehsal edən Almaniyanın Donaustahl şirkətinin rəhbəri Ştefan Tumanna sui-qəsd hazırladığı, lakin planın həyata keçirilməzdən əvvəl qarşısının alındığı iddia edilir.
Crossmedia.az xəbər verir ki, bu barədə “Die Zeit” məlumat yayıb.
Nəşrin yazdığına görə, Almaniya xüsusi xidmət orqanları xarici kəşfiyyatın təqdim etdiyi məlumat əsasında sui-qəsdin qarşısını alıb.
Jurnalistlərin əldə etdiyi məlumata görə, bu ilin yazında Tumanın öldürülməsinə hazırlıqda şübhəli bilinən iki nəfər saxlanılıb. Onlardan biri İspaniyada Ukrayna vətəndaşı Sergey N., digəri isə Almaniyada Rumıniya vətəndaşı Alla S. olub.
İstintaqın məlumatına görə, şübhəlilər 2025-ci ilin dekabrından 2026-cı ilin martına qədər Tumannı izləyib, onun evinin və Donaustahl şirkətinin baş qərargahının fotolarını çəkiblər.
“Die Zeit”in məlumatına görə, Almaniya xüsusi xidmətləri sui-qəsd hazırlığı barədə ilk məlumatı 2025-ci ilin sonunda əldə edib. Həmin il Ukrayna vətəndaşı da saxlanılıb, lakin kifayət qədər sübut olmadığı üçün sərbəst buraxılıb. Daha sonra onun Rusiya xüsusi xidmətləri ilə əlaqəsinin olduğu müəyyənləşdirilib.
Almaniya kəşfiyyatı Rumıniya vətəndaşının Tumanı izləməyə davam etdiyini müəyyən edib. 2026-cı ilin martında hər iki şübhəli koordinasiyalı əməliyyat zamanı saxlanılıb.
Hazırda Ştefan Tumannın gücləndirilmiş mühafizə altında olduğu bildirilir. O, müvəqqəti olaraq sərgilərdə iştirakını dayandırıb, lakin tezliklə fəaliyyətinə qayıdacağını açıqlayıb.
Rheinmetall rəhbərinə qarşı sui-qəsd iddiası
Qeyd edək ki, 2024-cü ildə ˝CNN˝ ABŞ və Qərb rəsmilərinə istinadən Rusiyanın Almaniyanın Rheinmetall şirkətinin baş direktoru Armin Pappergerə qarşı sui-qəsd planının ABŞ və Almaniya tərəfindən ifşa edildiyini yazmışdı.
2025-ci ildə NATO-nun innovasiya, hibrid və kiberməsələlər üzrə baş katibinin müavini Ceyms Appaturay ABŞ və Almaniya kəşfiyyatının Pappergerə qarşı sui-qəsd planını həqiqətən də pozduğunu təsdiqləmişdi.
Bununla belə, Donaustahl rəhbərinə qarşı yeni sui-qəsd iddiası ilə bağlı yayılan məlumatlar Almaniya və ya Rusiya tərəfindən rəsmi şəkildə təsdiqlənməyib.
23:20 05.08.2026
Oxunuş sayı: 51
