Trampı at peyinindən düzəltdilər – Minlərlə dollara satıldı
ABŞ Prezidenti Donald Trampın at peyinindən hazırlanmış portreti Kanadada keçirilən Sooke Fine Arts Show sərgisində 1,8 min ABŞ dollarına satılıb.
Crossmedia.az xəbər verir ki, "Yahoo" bu barədə məlumat yayıb.
Məlumata görə, kanadalı rəssam Vendi Şartran "The Don of Dung" ("Peyinin hökmdarı") adlı əsərini at peyinindən hazırlayıb. Portret sərgidə nümayiş etdirildikdən qısa müddət sonra alıcı tapıb.
Rəssam bildirib ki, istifadə etdiyi materialı qəsdən seçib və bununla ABŞ-nin siyasətinə münasibətini ifadə etmək istəyib.
Onun sözlərinə görə, kanadalılar bəzən ABŞ-də baş verən siyasi hadisələrdən yorulur və bu hisslərini incəsənət vasitəsilə ifadə etməyə çalışıb.
Şartran qeyd edib ki, əsərin hazırlanması zamanı güclü qoxuya görə açıq havada və ya maska ilə işləməli olub. Daha sonra qoxunu azaltmaq üçün portreti xüsusi lakla örtüb.
Rəssam əlavə edib ki, əsərin yaranmasına ABŞ-Kanada münasibətlərində müzakirə olunan "51-ci ştat" mövzusu, ticarət rüsumları və Qordi Hou körpüsü ətrafındakı vəziyyət ilham verib.
"Ola bilsin ki, hər şeyi dəyişmək mümkün deyil, amma bəzən buna gülmək daha yaxşıdır", – deyə Vendi Şartran bildirib.
16:48 03.08.2026
Oxunuş sayı: 55
