ABŞ-də tanınmış universitetin tədqiqatçısı hava limanında saxlanılıb
ABŞ-nin İmmiqrasiya və Gömrük Mühafizəsi Xidməti (ICE) "Cons Hopkins" Universitetinin tədqiqatçısı Fatima Ameakanı Baltimor/Vaşinqton hava limanında daxili reysə minmək istəyərkən saxlayıb.
Crossmedia.az xəbər verir ki, AFP bu barədə məlumat yayıb.
Məlumata görə, hadisə Donald Tramp administrasiyası dövründə ABŞ-də hava limanlarında miqrasiya yoxlamalarının gücləndirilməsi fonunda baş verib.
ABŞ Daxili Təhlükəsizlik Nazirliyi bildirib ki, Kamerun vətəndaşı olan Ameakanın vizasının müddəti 2024-cü ilin iyununda başa çatıb və o, ölkədə qanunsuz qalıb. Hazırda o, deportasiya prosedurunun başlanmasını gözləyərək ICE-nin nəzarəti altındadır.
"Cons Hopkins" Universitetinin "Blumberq" İctimai Səhiyyə Məktəbi əməkdaşın universitet ictimaiyyətinin hörmət edilən üzvlərindən biri olduğunu bildirərək ona lazımi dəstəyin göstərildiyini açıqlayıb.
Hüquqşünasların sözlərinə görə, son həftələr ABŞ-də hava limanlarında əcnəbilərin saxlanılması halları xeyli artıb. Xüsusilə vizasının müddəti bitmiş, lakin sığınacaq və ya nikah əsasında yaşayış icazəsi üçün müraciət etmiş şəxslər diqqət mərkəzindədir.
Amerika KİV-lərinin məlumatına əsasən, nəzarətin gücləndirilməsi ICE ilə Nəqliyyat Təhlükəsizliyi Administrasiyası (TSA) arasında əməkdaşlığın genişləndirilməsi nəticəsində mümkün olub. Bu əməkdaşlıq miqrasiya qaydalarını pozan şəxslərin uçuşdan əvvəlki yoxlama zamanı aşkarlanmasına imkan yaradır.
15:12 01.08.2026
Oxunuş sayı: 65
