Anasının ağciyərləri köçürülən qadınla toy rəqsi etdi – duyğulandıran hekayə
ABŞ-nin Texas ştatında bəy mərhum anasının xatirəsini qeyri-adi və duyğulu şəkildə yad edib.
Crossmedia.az xarici mediaya istinadən xəbər verir ki, Metyu Fert toyunda anasının ağciyərlərinin 13 il əvvəl köçürüldüyü Kerri Giddensi rəqsə dəvət edib.
Metyunun anası Emi 2012-ci ildə beyin trombozundan vəfat edib. Onun cəmi 38 yaşı olub.
Kerri Giddens isə uzun illər ağır kistik fibroz xəstəliyi ilə mübarizə aparıb və həyatını aparatların köməyi ilə davam etdirib. Emiyə məxsus donor ağciyərlərinin köçürülməsi Kerri üçün ikinci həyat şansı yaradıb.
Kerri bildirib ki, Metyunun onu anasının yerinə deyil, toy günü onun bir parçasına toxunmaq üçün rəqsə dəvət etməsi onun üçün böyük şərəfdir.
Metyu isə bu rəqsin ona mərhum anası ilə xüsusi yaxınlıq hissi yaşatdığını deyib.
“Mən bilirdim ki, qarşımdakı Kerridir, amma eyni zamanda onun içində sözün əsl mənasında anamın nəfəsi var idi. Bu, öz toyumda anamla həqiqətən rəqs etməyə ən yaxın hiss idi”, – bəy bildirib.
Əməliyyatdan ötən 13 il ərzində Fert ailəsi ilə Kerri arasında yaxın münasibət yaranıb. Onlar ad günlərini, ailə bayramlarını və digər mühüm tarixləri birlikdə qeyd edirlər.
Metyunun sözlərinə görə, əvvəlcə bu münasibət qeyri-adi görünsə də, zaman keçdikcə ailələr arasında dərin bağ yaranıb.
Metyunun ailəsi orqan donorluğunu təşviq edən xeyriyyə fondlarını da fəal şəkildə dəstəkləyir.
Bəyin babası Con Henderson bildirib ki, bu hekayədə iki fərqli taleyin kəsişməsi var: Emidən ayrılmağın faciəsi və Kerrinin həyatını xilas edən donor orqan.
Toyda qonaqların ən çox yadda saxladığı ifadələrdən biri isə ailə üzvlərindən birinin dediyi bu sözlər olub:
“Emi bu nəfəsi bağışladı, Kerri isə həmin rəqsi tamamladı˝.
04:50 31.07.2026
Oxunuş sayı: 37
