Qubadlı və Cəbrayılda modul tipli xəstəxanaların layihələndirilməsinə başlanılıb
TƏBİB-in İcraçı direktoru Vüqar Qurbanov qurumun 2024-cü ilin yekunlarına və 2025-ci ilin planlarına həsr olunmuş mətbuat konfransında işğaldan azad edilmiş ərazilərdə səhiyyə infrastrukturunun inkişafı ilə bağlı görülən işlərdən bəhs edib. Crossmedia.az xəbər verir ki , Vüqar Qurbanov bildirib ki, Qubadlı və Cəbrayılda modul tipli xəstəxanaların layihələndirilməsi işlərinə start verilib.
“İşğaldan azad edilmiş ərazilərdə ilkin səhiyyə xidmətlərinin təşkili üçün baş plan hazırlanıb. Bu çərçivədə 81 kənddə, 8 qəsəbə və 8 şəhərdə ilkin səhiyyə müəssisələrinin dəqiq yerləşmə nöqtələri və eskiz layihələri Səhiyyə Nazirliyinin tikinti mütəxəssisləri ilə birgə hazırlanaraq Nazirliyin Tikilməkdə Olan Müəssisələrin Müdiriyyəti İdarəsinə təqdim edilib,” – deyə Vüqar Qurbanov vurğulayıb.
Hazırda işğaldan azad edilmiş ərazilərdə bir sıra səhiyyə müəssisələri fəaliyyət göstərir. Bunlara Ağalı, Hadrut, Cəbrayıl, Laçın, Talış, Füzuli, Xocalı Ailə Sağlamlıq Mərkəzləri, Şuşa, Zəngilan, Ağdam modul xəstəxanaları, Ağdərə xəstəxanası və Xankəndi poliklinikası daxildir.
Bu addımlar Azərbaycanın azad olunmuş torpaqlarında yaşayışın bərpası və əhalinin səhiyyə xidmətlərinə çıxışının təmin edilməsi istiqamətində mühüm irəliləyiş kimi qiymətləndirilir.
Nihat Tahirov
08:27 23.12.2024
Oxunuş sayı: 17849
